لاہور25جنوری (اے پی پی ):وزیراعلیٰ پنجاب سردار عثمان بزدارکی زیر صدارت آج وزیراعلیٰ آفس میں صوبائی کابینہ کا اجلاس منعقد ہوا۔پنجاب کابینہ کے اجلاس میں صوبے کے ہر شہری کو ہیلتھ کوریج فراہم کرنے کا فیصلہ کیا گیااورکابینہ نے پنجاب کی 100فیصد آبادی کو دسمبر2021تک ہیلتھ انشورنس فراہم کرنے کیلئے یونیورسیل ہیلتھ کوریج پروگرام کی منظوری دے دی جبکہ یونیورسیل ہیلتھ کوریج پروگرام سے متعلقہ امور طے کرنے کیلئے وزارتی کمیٹی تشکیل دی گئی۔کابینہ نے بھکر میں تھل یونیورسٹی کے قیام کی منظوری دی۔اجلاس میں متروکہ وقف املاک اورڈسپلیسڈ پرسنز لاز (Repeal) ایکٹ1975ء میں ترامیم کی اصولی منظوری دی گئی۔سٹینڈنگ کابینہ کمیٹی برائے قانونی امورترامیم کاجائزہ لیکرحتمی رپورٹ دے گی۔ان ترامیم سے سالہاسال سے اراضی کے کلیمز کے زیر التواء کیسوں کو نمٹانے میں مدد ملے گی۔کابینہ نے اس ضمن میں حتمی ڈیڈ لائن کو جلد از جلد مشتہر کرنے کی ہدایت کی۔اجلاس میں لاہور سینٹرل بزنس ڈسٹرکٹ ڈویلپمنٹ اتھارٹی کے قیام کی اصولی منظوری دی گئی۔اتھارٹی والٹن ائیرپورٹ اورگرد ونواح میں بزنس سرگرمیوں کو فروغ دینے کیلئے کام کرے گی اور ملکی و غیر ملکی سرمایہ کاروں کو ترجیحی بنیادوں پر سہولتیں فراہم کرے گی۔کابینہ نے سیالکوٹ ڈویلپمنٹ اتھارٹی کے قیام کی منظوری دی۔اجلاس میں دی پنجاب آب پاک اتھارٹی (اپائمنٹ اینڈ کنڈیشنز آف سروس)رولز 2020کی اصولی منظوری دی گئی۔اجلاس میں ضلع بھکر میں آرمی ویلفیئر سکیم کیلئے الاٹ کی جانیوالی 1626ایکڑاور2کنال اراضی کے متبادل زمین دینے کی منظوری دی گئی۔متبادل اراضی یزمان اورفورٹ عباس میں دی جائے گی۔ اجلاس میں ڈویلپمنٹ اتھارٹی ایکٹ 2014کی شق 19 کے تحت املاک کی منتقلی اورمینجمنٹ کے مسودہ قانون اور ڈاکخانوں کے ذریعے موٹرو ہیکلز ٹیکسوں کی وصولی کااختیار واپس لینے کی منظوری دی گئی۔کابینہ کے اجلاس میں پنجاب اربن ایموایبل(Immovable) پراپرٹی ٹیکس ایکٹ 1958ء کے سیکشن 16میں ترمیم کا فیصلہ کیا گیا۔ترمیم سے نادہندگان کی جائیدادیں سیل کرنے کا اختیار محکمہ ایکسائز کو ہوگا۔کابینہ نے انفراسٹرکچر ڈویلپمنٹ اتھارٹی پنجاب کوخیبر پختوانخوامیں سرگرمیاں شروع کرنے کی اجازت دینے کی منظوری دی۔انفراسٹرکچرڈویلپمنٹ اتھارٹی پنجاب منصوبوں کے حوالے سے خیبر پختوانخوا حکومت کی معاونت کرے گی۔کابینہ نے مشترکہ مفادات کونسل کے مستقل سیکرٹریٹ کے قیام کے حوالے سے وفاقی حکومت کے فیصلے کی توثیق کی۔اجلاس میں راوی اربن ڈویلپمنٹ اتھارٹی ایکٹ 2020میں ترامیم کی منظوری دی گئی جبکہ راوی اربن ڈویلپمنٹ اتھارٹی کودیئے گئے 5ارب روپے کے قرضے کی باقی رقم دیگر مدات میں استعمال کرنے کی اجازت دی گئی۔اجلاس میں انرجی معاہدوں کیلئے غیر ملکی کرنسی کے تبادلے کیلئے چائنیزکرنسی یوآن(Yuan) کے استعمال کی منظوری دی گئی۔اجلاس میں پنجاب پولیس میں ڈی ایس پی اورایس پی کی ترقی کیلئے سروس رولز کی اصولی منظوری دی گئی۔سروس رولز کی منظوری سے سالوں سے ترقی کے منتظر سینکڑوں افسران مستفید ہوسکیں گے۔کابینہ نے سرگودھا اورراولپنڈی میں انسداد دہشت گردی کی دو عدالتیں بند کرنے کی منظوری دی۔اجلاس میں پنجاب گورنمنٹ رولز آف بزنس برائے ساؤتھ پنجاب کی اصولی منظوری دی گئی۔پنجاب وویمن پروٹیکشن اتھارٹی کی چیئرپرسن کیلئے مراعات کے تعین کی بھی منظوری دی گئی۔اجلاس میں پنجاب کابینہ کے 38ویں اور39ویں اجلاس کی کارروائی کی توثیق کی گئی۔سٹینڈنگ کابینہ کمیٹی برائے فنانس اینڈ ڈویلپمنٹ کے 46ویں اور47ویں اجلاس کے فیصلوں کی توثیق کی گئی۔سٹینڈنگ کابینہ کمیٹی برائے قانونی امورکے 40ویں، 41ویں،42ویں اور43ویں اجلاس کے فیصلوں کی بھی توثیق کی گئی۔صوبائی وزراء،مشیران،معاونین خصوصی،چیف سیکرٹری اوراعلی حکام نے اجلاس میں شرکت کی۔
