لاہور، 25 جنوری (اے پی پی): وزیراعلیٰ پنجاب سردار عثمان بزدارسے چیئرمین واٹراینڈانوائرمنٹل جوڈیشل کمیشن جسٹس (ر) علی اکبر قریشی نے پیر کو یہاں ملاقات کی۔ملاقات میں جسٹس (ر) علی اکبر قریشی نے وزیراعلیٰ عثمان بزدار کو کمیشن کی کارکردگی سے آگاہ کیا اور کارکردگی کی رپورٹ بھی پیش کی۔
اس موقع پر وزیر اعلیٰ پنجاب سردار عثمان بزدار نے کہا پانی بہت بڑی نعمت ہے، پانی کا ضیاع روکنا ہم سب کی مشترکہ ذمہ داری ہے، پانی کو احتیاط سے استعمال کرنے کے حوالے سے بھر پور آگاہی مہم چلائی جائے گی،پانی کا ضیاع روکنے کیلئے عوام میں شعورکو اجاگر کرنا ضروری ہے۔
انہوں نے کہا کہ لاہورسمیت دیگر شہروں میں زیرزمین پانی کی سطح بہت نیچے چلی گئی ہے،ہم نے اپنی نسلوں کیلئے پانی کاقطرہ قطرہ بچاناہے۔انہوں نے کہا بارش کے پانی کومحفوظ بنانے کیلئے لاہور میں نئے زیر زمین ٹینک بنانے کا منصوبہ بنایا ہے،اس منصوبے پر جلد کام شروع کیا جارہا ہے،جنوبی پنجاب میں پانی ذخیرہ کرنے کیلئے سمال ڈیمزکا پراجیکٹ بنایا ہے،رواں برس پہلے ڈیم کا سنگ بنیاد رکھا جائے گا۔
وزیر اعلی پنجاب نے کمیشن کی کارکردگی کو سراہا اور قابل ستائش قرار دیتے ہوئے کہا کہ کمیشن دیگر ڈویژنل ہیڈکوارٹرمیں بھی جاکرپانی کا ضیاع روکنے کیلئے اقدامات اٹھائے،حکومت سپورٹ کرے گی۔
ملاقات میں گفتگو کرتے ہوئے جسٹس (ر) علی اکبر قریشی نے کہا لاہور کی 210مساجد میں پانی کودوبارہ استعمال کرنے کیلئے ٹینک بنائے گئے ہیں،سب سے بڑا ٹینک داتا دربار مسجد میں بن رہا ہے۔
انہوں نے کہا کہ لاہور سے گزرنے والی نہر کے 17بند چینلز کو دوبارہ کھولا گیا ہے،310 کار سروس سٹیشن میں واٹر ری سائیکلنگ پلانٹ لگائے جاچکے ہیں،انہوں نے بتایا کہ کارسروس سٹیشن اورپرائیویٹ ہاؤسنگ سوسائیٹیوں سے پہلی دفعہ واٹر چارجزوصول کررہے ہیں، ایک برس میں بلنگ کی مد میں 1ارب4کروڑ روپے وصول کر کے سرکاری خزانے میں جمع کرائے ہیں۔
انہوں نے مزید کہا کہ پانی کا ضیاع روکنے کیلئے حکومت پنجاب کا تعاون قابل تحسین ہیں۔
