اسلام آباد،12 جنوری)اے پی پی ): وزیر داخلہ شیخ رشید احمد سے جاپان کے سفیر کینو نوری متسودا نے منگل کو یہاں ملاقات کی ۔ ملاقات میں پاکستان اور جاپان کے درمیان تعلقات کے فروغ اور باہمی دلچسپی کے دیگر امور پر بات چیت کی گئی ۔
وزیر داخلہ شیخ رشید احمد نے پاکستان کی اقتصادی اور سماجی ترقی میں جاپان کے کردار کی تعریف کرتے ہوئے کہا کہ پاکستان اور جاپان کے تعلقات دیرینہ ہے،جاپان نےمشکل حالات میں بھی ہمیشہ پاکستان کی مدد کی ہے۔انہوں نے کہا کہ کرونا کی وبا کے خلاف جاپانی مدد پر حکومت کے شکر گزار ہیں۔
جاپانی سفیر نے کہا کہ پاکستان میں امن وامان سے متعلق اقدامات کو سراہتے ہیں اور پاکستان کی ترقی کے لئے پر امید ہیں۔ انہوں نے آئی سی ٹی کی سکیورٹی اور پولیس چیک پوسٹوں کے حوالے سے حالیہ اقدامات کی تعریف کرتے ہوئے کہا کہ غیر ضروری چیک پوسٹیں ختم کرنے سے عوام کی آمدورفت میں سہولیات پیدا ہوئی ہیں۔
وزیر داخلہ نے کہا کہ پاکستان اور جاپان کے درمیان قانون نافذ کرنے والے اداروں کے درمیان تعاون بڑھانے کی ضرورت ہے جبکہ پولیس کی پیشہ وارانہ ٹریننگ کے حوالے سے جاپان کی حکومت سے تعاون لیں گے۔انہوں نے کہا کہ وزرات داخلہ کے مختلف منصوبوں میں جاپانی حکومت کے مالی اور تکنیکی تعاون پر مشکور ہیں۔
انہوں نےمزید کہا کہ باہمی اشتراک بڑھانے اورایک دوسرے کے تجربات سے سیکھنے کی ضرورت ہے۔
