اسلام آباد،16فروری(اے پی پی):وزیر خارجہ مخدوم شاہ محمود قریشی نے کہا ہے کہ معاشی سفارت کاری کو پیش نظر رکھتے ہوئے، افریقی ممالک کے ساتھ تجارت کا فروغ ہماری حکومت کی اہم ترجیحات میں شامل ہے۔
مصر کے دو روزہ دورے پر روانگی سے قبل اپنے ویڈیو پیغام میں وزیر خارجہ مخدوم شاہ محمود قریشی نے کہا کہ مصری وزیر خارجہ کی دعوت پر مصر کے دو روزہ دورے پر روانہ ہو رہا ہوں تاکہ اس اہم ملک کے ساتھ روابط کو فروغ دیا جا سکے۔انہوں نے کہا کہ مصر مسلم امہ کا ایک اہم ملک ہے جسے افریقہ کا “گیٹ وے” بھی کہا جاتا ہے،دونوں ممالک کے درمیان معاشی تعاون کے فروغ کے حوالے سے بے پناہ امکانات موجود ہیں۔
وزیر خارجہ نے کہا کہ دورے کے دوران مصر کے وزیر خارجہ سے ملاقات کروں گا،جس میں دو طرفہ تعلقات کے حوالے سے تفصیلی تبادلہ ء خیال کیا جائے گا۔انہوں نے کہا کہ مصر میں میری بزنس کمیونٹی سے ملاقات ہو گی اور میڈیا نمائندگان کے ساتھ گفتگو کا موقع بھی میسر آئے گا جبکہ جامعہ الازہر جانے کا بھی دورہ کروں گا، ہماری خواہش ہے کہ ہم تعلیمی شعبے میں ان کے تجربات سے استفادہ کر سکیں۔
