کوئٹہ، یکم فروری(اے پی پی): وزیر تعلیم سردار یار محمد رند نے کہا کہ صوبائی حکومت کی روز اول سے کوشش رہی ہے کہ بلوچستان میں میرٹ کی بنیاد پر نوجوانوں کو روزگار فراہم کیا جائے جبکہ ماضی میں ہزاروں پوسٹوں پر تعیناتی نہ ہونے سے ضائع ہوگئیں۔
وزیر تعلیم سردار یار محمد رند نے بوائز سکاوٹس میں ضلع کوئٹہ کے 388 ٹیچروں میں تعیناتی کے آرڈر تقسیم کی تقریب سے خطاب کرتے ہوئے کہا کہ وزیر اعلی بلوچستان جام کمال خان کی روز اول سے کوشش رہی ہے کہ بلوچستان میں میرٹ کی بنیاد پر نوجوانوں کو روزگار فراہم کیا جائے۔ انہوں نے کہا کہ ہماری حکومت کی اولین ترجیح ہے کہ عوام کو تعلیم صحت روزگار پینے کے صاف پانی بجلی اور گیس سڑکوں کی تعمیر ر اور عوام کے ہر دکھ درد میں شریک ہونا ہے آج جن اساتذہ کو تعیناتی آرڈر زملے ہیں ان پر قوم کی نئی نسل کو تعلیم یافتہ اور ان کی اعلی طریقے سے تربیت کرنے کی زمہ داری ادا ہوتی ہے۔کیونکہ مستقبل کے معماروں کو تعلیم کے زیور سے مالامال کرنا ہے یہ اساتذہ کی ذمہ داری ہے کہ وہ اپنی ڈیوٹی ایمانداری سے ادا کریں۔
صوبائی وزیر تعلیم نے کہا کہ کچلاک پنجپائی،اغبرگ اور نوحصار کے اسکولوں میں اساتذہ کی کمی، عمارتوں کی خستہ حالت، بجلی اورگیس پانی بیت الخلا تک کی سہولت نہیں ہے جس سے طلباءاور اساتذہ کو شدید مشکلات درپیش ہیں جن کی فوری حل کے لیے توجہ درکار ہے۔
