اسلام آباد ، 05 فروری (اے پی پی ): وزیر اعظم عمران خان نے کہا ہے کہ موجودہ حکومت کسانوں کی خوشحالی اور زرعی شعبے کی ترقی کے لئے پر عزم ہے۔عنقریب کسانوں کے لئے پاکستان کی تاریخ کے سب سے بڑے زرعی پیکیج کا اعلان کیا جائے گا۔
انہوں نے ان خیالات کا اظہار پاکستان تحریک انصاف کے سرگودھا سے تعلق رکھنے والے رہنماؤں کے وفد سے گفتگو کرتے ہوئے کیا جس نے جمعہ کو یہاں وزیر اعظم سے ملاقات کی۔
ملاقات میں پارٹی کے امور، عوام کو درپیش مسائل کے حل، فلاحی و ترقیاتی امور کے حوالے سے تبادلہ خیال کیا گیا۔وفد سے گفتگو کرتے ہوئے وزیراعظم نے کہا کہ عنقریب کسانوں کے لئے پاکستان کی تاریخ کے سب سے بڑے زرعی پیکیج کا اعلان کیا جائے گا ۔انہوں نے کہا کہ آج ملک میں گنے، چاول، سٹرس کے کاشتکاروں کو فصلوں کا زیادہ منافع مل رہا ہے جس سے دیہی علاقوں میں خوشحالی آ رہی ہے ۔
وفد میں اسامہ غیاث میلہ، انصر اقبال ہرل اور میجر جنرل (ریٹائرڈ) سلیم میلہ شامل تھے۔وزیر اعظم کے معاون خصوصی ملک محمد عامر ڈوگر اور ڈپٹی اسپیکر قومی اسمبلی قاسم خان سوری بھی ملاقات میں شریک تھے۔
