نارووال، 03جنوری ( اے پی پی) :وزیر اعلی پنجاب کی ہدایت پر ڈپٹی کمشنر نارووال کی زیر نگرانی نارووال شکرگڑھ اور ظفروال میں عوام دوست انقلابی قدم کے تحت ریونیو عوامی خدمت کچہری بسلسلہ حصول ریونیو ریکارڈ کا انعقاد
کیا گیا۔
اسسٹنٹ کمشنرز نے ریونیو معاملات کے حوالے سے شکایات سنی اور ان کے فوری حل کے لئے احکامات صادر کئے،اس سلسلہ میں ڈپٹی کمشنر ظہیر حسن نے بھی تحصیل ہیڈ کواٹرز کمپلیکس نارووال میں ریونیو کھلی کچہری میں آنے والے سائلین کی شکایات کو سنا اور ان کے فوری ازالے کے لئے متعلقہ افسران کو موقع پر احکامات صادر کئے۔
ڈپٹی کمشنر ظہیر حسن نے کھلی کچہری میں آنے والے سائلین سے خطاب کرتے ہوئے کہا کہ وزیر اعلی پنجاب کی خصوصی ہدایت پرماہانہ ریونیو عوامی خدمت کچہری کے انعقاد سے لوگوں کو روز مرہ کے معاملات وراثتی انتقالات،فرد و رجسٹریشن،ناجائز قبضہ،ڈومی سائل کے حصول کے علاوہ دیگر مسائل کو حل کرنے میں بھرپور مدد مل رہی ہے اور عوامی شکایات کے فوری ازالے کے لئے ڈپٹی کمشنر سے لے کر ریونیو افسران سمیت پٹواری تک ایک چھت تلے موجود ہیں۔
ڈپٹی کمشنر نارووال نے ریونیو افسران کو ہدایت کی کہ وہ لوگوں کے مسائل کے فوری ازالے کے لیے اپنے آپ کو وقف کریں اور شہریوں کی شکایات کو ترجیحی بنیادوں پر حل کریں اس حوالے سے کسی قسم کی غفلت برداشت نہیں کی جائے گی کیونکہ لوگوں کے مسائل کا فوری ازالہ حکومت کی اولین ترجیح ہے۔
انہوں نے ناجائزقبضہ مافیا کے دن گنے جاچکے ہیں اور اس سلسلہ میں حکومتی ہدایات کی روشنی میں ضلعی انتظامیہ بلاتفریق قبضہ مافیا کے خلاف کاروائی عمل میں لارہی ہے۔
اس موقع پر ڈپٹی کمشنر نارووال نے ریونیو عملہ کو ہدایت کی کہ وہ عوامی شکایات کے فوری ازالے کے لیے بلاخوف و خطر کام کریں۔
اے ڈی سی آر عائشہ غضنفر، اسسٹنٹ کمشنر سیدہ تہنیت بخاری،تحصیلدار رائے محمد حسین نواز،ریونیو آفیسر محمد ارشد، شہزاد انورسمیت تمام متعلقہ ریونیو افسران و سٹاف بھی اس موقع پر موجود تھے۔
