پاراچنار،07فروری(اے پی پی): سیکورٹی فورسز کی جانب سے امن جرگے کا انعقاد کیا گیا جس میں ضلع بھر سے قبائلی عمائدین علماء اور پارلیمنٹیرینز نے شرکت کی، جرگہ میں مسائل کے حل کیلئے کمیٹی تشکیل دینے کا فیصلہ کیا گیا۔
جرگہ سے خطاب کرتے ہوئے پاک فوج 73 بریگیڈ کے کمانڈر بریگیڈیئر نجف عباس کا کہنا تھا کہ فورسز کی خواہش ہے کہ ضلع کرم سمیت ملک کے چپے چپے میں امن ہو تاکہ سازشی عناصر کو اپنے مقاصد کی تکمیل میں ہر محاذ پر ناکامی کا سامنا کرنا پڑے۔ انہوں نے کہا کہ امن جرگے کا مقصد ضلع کرم کے حل طلب مسائل کو حل کرنا ہے اور قیام امن کے حوالے سے ضلع کرم کے علماء اور قبائلی عمائدین کا تعاون قابل ستائش ہے۔
اس موقع پر رکن قومی اسمبلی ساجد طوری، قبائلی رہنماؤں حاجی سردار حسین ، سید محمود جان میاں ، حاجی سلیم خان ، ڈاکٹر عبدلقادر ، حاجی بخت جمال ، قاضی سید افتخار ، مولانا الطاف حسین ، حاجی عمران الدین اور دیگر رہنماؤں نے کہا کہ امن کیلئے جو قدم ہمیں اٹھانا چاہئے تھا اس میں آرمی کا کردار قابل ستائش ہے، پاک فوج کیساتھ امن کوششوں میں ہم شانہ بشانہ ہونگے اور پر امن ماحول میں ہی ترقی کا راز پوشیدہ ہے۔
جرگہ کے اختتام پر کمانڈنگ پاک فوج کرنل محمد جاوید الیاس نے کہا کہ دوسرے امن جرگے کا انعقاد منگل کے روز صدہ لوئر کرم میں ہوگا جس میں حل طلب مسائل کے حل کیلئے کمیٹی تشکیل دی جائے گی۔
جرگہ کے شرکا کے لئے فورسز کی جانب سے ظہرانے کا اہتمام بھی کیا گیا ۔
