لاہور،18 فروری(اے پی پی): وزیراعلیٰ پنجاب سردار عثمان بزدار نے کہا ہے کہ پاکستان تحریک انصاف سینیٹ الیکشن میں اکثریتی پارٹی بن کر سامنے آئے گی، عوام اپوزیشن عناصر کے دوغلے چہروں کو پہچان چکے ہیں۔
وزیراعلیٰ پنجاب سردار عثمان بزدار سے پاکستان تحریک انصاف کے چیف آرگنائزر سیف اللہ خان نیازی کی قیادت میں وفد نے ملاقات کی۔اس موقع پر پاکستان تحریک انصاف سینٹرل پنجاب کے صدر اعجاز احمد چوہدری اور رکن قومی اسمبلی صداقت عباسی بھی موجود تھے۔
ملاقات میں سیاسی صورتحال، پارٹی امور اور سینیٹ کے انتخابات کے حوالے سے لائحہ عمل پر گفتگو ہوئی۔وزیراعلیٰ عثمان بزدار نے سینیٹ الیکشن کیلئے تحریک انصاف کے امیدواروں سیف اللہ خان نیازی، اعجاز احمد چوہدری اور دیگر کیلئے نیک خواہشات کا اظہار کیا۔
گفتگو کے دوران وزیر اعلیٰ پنجاب نے کہا کہ سینیٹ الیکشن میں منڈیاں لگانے والوں کو ناکامی کا سامنا کرنا پڑے گا،اوپن بیلٹ کی مخالفت کرنے والوں کے اندر خوف ہے اور انہیں شکست نظر آ رہی ہے۔انہوں نے کہا کہ ہارے ہوئے عناصر کو ایک بار پھر منہ کی کھانا پڑے گی،الیکشن میں شفافیت کیلئے اوپن بیلٹ ضروری ہے۔
اس موقع پر سیف اللہ خان نیازی نے کہا کہ وزیراعظم عمران خان اور آپ نے حکومتی امور میں شفافیت کی مثال قائم کی ہے،عوام کو تحریک انصاف کی قیادت پر مکمل اعتماد ہے۔انہوں نے کہا کہ اپوزیشن کا منفی بیانیہ پٹ چکا ہے،سینیٹ الیکشن میں اوپن بیلٹ کی مخالفت سے ان کے چہرے سے جمہوری لبادہ اتر چکا ہے۔
سیف اللہ خان نیازی نے مزید کہا کہ یہ لوگ صرف پیسے کی سیاست کرنے کے عادی ہیں۔
