لاہور،3فروری(اے پی پی):پنجاب میں کورونا ویکسین لگانے کی مہم کا باقاعدہ آغاز ہو گیا ہے ،وزیر اعلی پنجاب سردار عثمان بزدار اور گورنر پنجاب چوہدری محمد سرور نے صوبے میں کورونا ویکسین لگانے کی مہم کا افتتاح کر دیا ۔وزیر اعلی عثمان بزدار گورنر چوہدری محمد سرور کی موجودگی میں فرنٹ لائن ہیلتھ ورکرز کو کورونا ویکسین لگائی گئی۔
راولپنڈی انسٹی ٹیوٹ آف یورالوجی کے ڈاکٹر فراز اور لیڈی ڈاکٹر سماویہ اکبر کو کورونا ویکسین لگا کر پنجاب میں ویکسین لگانے کی مہم کا آغاز کیا گیا۔وزیر اعلی عثمان بزدار اور گورنر چوہدری محمد سرور نے ویکسین لگانے کے عمل کا مشاہدہ کیا۔ڈاکٹرز کو کورونا ویکسین لگانے کی تقریب پنجاب ہاؤس اسلام آباد میں منعقد ہوئی۔
اس موقع پر وزیر اعلی پنجاب عثمان بزدار نے کہا کہ پہلے مرحلے میں صوبے کے فرنٹ لائن ہیلتھ ورکرز کو ویکسین لگانے کی مہم کا آج باقاعدہ آغاز کیا گیا ہے ۔دوسرے مرحلے میں ہیلتھ ورکرز کے ساتھ بزرگ شہریوں کوکورونا ویکسین لگائی جائے گی۔ان کا کہنا ہے کہ حکومت شہریوں کو مفت ویکسین لگائے گی، کوروناویکسین لگانے کے لئے پنجاب میں 189مراکز قائم کئے گئے ہیں ۔
وزیر اعلی پنجاب نے کہا کہ ویکسی نیشن مراکز میں کوروناویکسین لگوانے والوں کا مکمل ڈیٹا محفوظ رکھا جائے گا، 4 لاکھ سے زائد فرنٹ لائن ہیلتھ کیئرورکرز کی رجسٹریشن مکمل ہو چکی ہے ۔انہوں نے کہا کہ پنجاب کے 36 اضلاع میں اب تک 600 سے زائد افرادکو تیکنیکی تربیت فراہم کی گئی ہے،ماسٹر ٹرینرز کو مزید عملہ کی تربیت کیلئے تیارکیاگیاہے۔انہوں نے مزید کہا کہ 70 ہزار کورونا ویکسین کی ڈوزز پنجاب کو ملی ہیں -مزید ویکسین بھی اگلے تین ہفتے میں ملے گی –
وزیر اعلی عثمان بزدار نے کہا کہ کوروناویکسین کومحفوظ رکھنے کیلئے پنجاب کے 36 اضلاع میں 2500 آئس لائن ریفریجریٹرز کا انتظام کیا گیا ہے،پاکستان کو کورونا ویکسین مہیا کرنے پر دوست ملک چین کے شکر گزار ہیں ۔انہوں نے کہا کہ چین نے مشکل کی ہر گھڑی میں پاکستان کا ساتھ دیا ہے ،چین کے اس تعاون کو ہمیشہ یاد رکھا جائے گا، کوروناسے بچاؤ کیلئے احتیاطی تدابیرپر سختی سے عملدرآمد ضروری ہے ۔
وزیر اعلی پنجاب عثمان بزدار نے کہا کہ پنجاب میں کنٹیکٹ ٹریسنگ باقی صوبوں کے مقابلے میں سب سے زیادہ ہے دنیا نے پاکستان میں کوروناوائرس پر قابوپانے کیلئے اٹھائے گئے اقدامات کوسراہا ہے۔انہوں نے کہا کہ پنجاب میں ایس اوپیز پرعملدرآمدکرواتے ہوئے تعلیمی اداروں کوکھول دیاگیاہے،حکومت پنجاب نے ضرورت پڑنے پرکوروناویکسین کی خریداری کیلئے ایک ارب سے زائد روپے کی رقم مختص کی ہے۔
اس موقع پرگورنر پنجاب چوہدری محمد سرور نے کہا کہ کورونا ویکسین لگانے کی مہم کا آغاز خوش آئند ہے،پنجاب حکومت نے کورونا ویکسین لگانے کے لئے تمام انتظامات مکمل کئے ہیں ۔انہوں نے کہا کہ ہیلتھ کیئر ورکرز نے انتہائی محنت اور جانفشانی کے ساتھ کورونا وباء کے دوران خدمات سرانجام دی ہیں ،ہیلتھ کیئرورکرز ہمارے ہیرو ہیں۔
