برسلز (بیلجئیم)،05فروری(اے پی پی): یوم یکجہتی کشمیر کے موقع پر ایک خصوصی پیغام میں پاکستان کے ایلچی برائے یوروپی یونین ، بیلجیئم اور لکسمبرگ سفیر ظہیر اے جنجوعہ نے عالمی برادری خصوصاً یورپی یونین پر زور دیا ہے کہ وہ کشمیری عوام کے بنیادی انسانی حقوق اور آزادی کو یقینی بنانے کے لئے اپنا کردار ادا کرے۔
اپنے ویڈیو پیغام میں سفیر ِ پاکستان نے غیرقانونی ہندوستانی قبضے سے آزادی کی جدوجہد میں بہادر کشمیری عوام کو پاکستان کی حمایت کی تصدیق کی۔ انہوں نے کہا کہ کشمیری عوام نے 7 دہائیوں سے زیادہ اپنے حق خودارادیت کے جائز حق کے لئے بے مثال قربانیاں دی ہیں۔
5 اگست 2019 کی بھارتی غیر قانونی اور یکطرفہ کارروائیوں کا ذکر کرتے ہوئے انہوں نے کہا کہ ہندوستان نے اپنے غیر قانونی قبضے کو برقرار رکھنے اور اقوام متحدہ کی قراردادں کی خلاف ورزی کرتے ہوئے آبادیاتی ڈھانچے کو تبدیل کر کے جموں وکشمیر کی خصوصی حیثیت کو تبدیل کیا ہے۔
سفیرِ پاکستان نے مزید کہا کہ ہزاروں بے گناہ افراد کو من مانی طور پر حراست میں لیا گیا ہے اور ہزاروں نوجوانوں کو نامعلوم مقامات پر اغوا کرکے قید کیا گیا ہے۔ انہوں نے کہا کہ یہ کشمیریوں کے خلاف ہندوستانی ریاستی دہشت گردی کا حقیقی مظہر ہے۔
انہوں نے فوجی محاصرے اور مواصلاتی بلیک آؤٹ کو فوری طور پر ختم کرنے ، بھارت کی غیر قانونی اور یکطرفہ کارروائیوں کو روکنے ، غیرقانونی طور پر گرفتار اور قید کشمیریوں کی رہائی اور انسانی حقوق کی عالمی تنظیموں اور میڈیا کی رسائی کا مطالبہ کیا۔
سفیر ِ پاکستان نے اقوام متحدہ کی سلامتی کونسل کی قراردادوں کے مطابق کشمیری عوام کے حق خودارادیت کے جائز حق کے حصول کے لئے پاکستان کی اخلاقی ، سیاسی اور سفارتی حمایت کو بھی دہرایا۔
