اسلام آباد۔11فروری (اے پی پی): وزیرِ اعظم عمران خان نے نالہ لئی منصوبہ کی منظوری دیتے ہوئے فوری کام شروع کرنے کی ہدایت کر دی ہے ، منصوبہ کا تخمینہ 75 ارب روپے ہے اور یہ منصوبہ 2 سال میں مکمل کیا جائے گا، منصوبہ کے تحت نالہ لئی کے دونوں اطراف ایکسپریس وے تعمیر کی جائے گی،منصوبہ کو پبلک پرائیویٹ پارٹنر شپ کے تحت مکمل کیا جائے گا۔ وزیراعظم نے یہ منظوری جمعرات کو نالہ لئی منصوبے کے حوالے سے اجلاس کی صدارت کرتے ہوئے دی۔ اجلاس میں وزیرِ داخلہ شیخ رشید احمد اور سینئر افسران نے شرکت کی جبکہ وزیراعلیٰ پنجاب کے معاون خصوصی ڈاکٹر سلمان شاہ اور چیف سیکرٹری پنجاب نے ویڈیو لنک کے ذریعے اجلاس میں شرکت کی۔ اجلاس میں وزیراعظم نے نالہ لئی منصوبے کی منظوری دے دی، اس منصوبے کا تخمینہ 75ارب روپے ہے، یہ منصوبہ دو سال میں مکمل کیا جائے گا، اس منصوبے کے تحت نالہ لئی کے دونوں اطراف ایکسپریس وے تعمیر کی جائے گی، سرکاری زمین پر دو مال بھی بنائے جائیں گے، منصوبے کو پبلک پرائیویٹ پارٹنرشپ ماڈل کے تحت مکمل کیا جائے گا۔ وزیرِ اعظم نے منصوبے پر فوری طور پر کام شروع کرنے کی بھی ہدایت کی۔ وزیراعظم نے کہا کہ اس منصوبے کے ساتھ ساتھ متعلقہ علاقے کی زوننگ اور اس حوالے سے بائی لاز( ذیلی قوانین) میں تبدیلی کا عمل بھی چند ہفتوں میں مکمل کیا جائے تاکہ ایکسپریس وے کے دونوں اطراف کثیر المنزلہ اور کمرشل مارکیٹیں تعمیر ہو سکیں۔ انہوں نے کہا کہ راولپنڈی کے مسائل حل کرنا اولین ترجیح ہے، منصوبہ راولپنڈی شہر کی ٹرانسفارمیشن میں اہم سنگ میل ثابت ہوگا۔ وزیرِ اعظم کو راولپنڈی رنگ روڈ منصوبے اور اس میں پیشرفت پر بھی تفصیلی بریفنگ دی گئی۔
