اسلام آباد,22مارچ (اے پی پی):وزیرریلوے اعظم خان سواتی نے کہا ہے کہ ریلوے کے سفر کو سہولیات سے آراستہ کریں گے،مزدوروں کی فلاح وبہبود کے لئے اقدامات اٹھا رہے ہیں۔پی آئی ڈی میں پریس کانفرنس سے خطاب کرتے ہوئے وزیر ریلوے نے کہا کہ ریلوے کے ادارے سے کالی بھیڑوں کا محاسبہ کریں گے،ریلوے کے خسارے کو جلد ختم کرکے منافع بخش ادارہ بنائیں گے،ریلوے کی ایک انچ زمین بھی نہیں بیچی جائے گی لیکن اس زمین کو اس طرح استعمال کریں گے کہ اس کا فائدہ ہو،ریلوے ٹکٹوں کے نظام کو ڈیجیٹلائز کیا جارہا ہے،ریلوے نے ایف ڈبلیو او کے ساتھ ایم او یو پر دستخط کئے ہیں،ریلوے سٹیشنز کو جدید خطوط پر استوار کیا جائے گا،تین مہینے کے اندر 30 ارب روپے کمانے کا ہدف مقرر کیا ہے،40 ارب کمانے کی گنجائش ہے،دو ہزار ویگنیں بالکل تیار پڑی ہیں جنہیں پی ایس او استعمال نہیں کررہا،اگر پی ایس او استعمال کرے تو 3 ارب کا فائدہ ہوگا۔اعظم خان سواتی نے کہا کہ ان کی ڈائری میں سال نہیں ہے،گھنٹے،دن ہفتے اور مہینے ہیں،وہ تمام کام جلد اور فوری طور پر کرنے پر یقین رکھتے ہیں،ریلوے مزدور محنتی ہیں اور ان کی آنکھ کا تارا ہیں لیکن چند کالی بھیڑیں ہیں جو ریلوے کو ناقابل تلافی نقصان پہنچا رہی ہیں،ریلوے میں 2 سے اڑھائی ارب بجلی کے نام پر چوری ہورہے ہیں،ایسے تمام عناصر کے خلاف سخت کارروائی کریں گے جو ریلوے کو نقصان پہنچا رہے ہیں،ریلوے حادثات کو روکنے کے لئے بھی ترجیح بنیادوں پر اقدامات کئے جارہے ہیں۔انہوں نے کہا کہ میں نے 19 گریڈ کے افسران کو کہا ہے کہ حادثہ ہوگا تو وہ ذمہ دار ہوں گےاس لئے اپنے انسپیکشن کے نظام کو بہتر بنائیں۔انہوں نے کہا کہ میں ریلوے کا ایک روپیہ اپنے اوپر خرچ نہیں کرتا،اس ادارے کو کرپشن سے پاک اور منافع بخش قومی ادارہ بنانے کے لئے ہر ممکن کوشش کروں گا۔
