صحافت ریاست کا چوتھا ستون ہے،موجودہ حکومت آزادی اظہار رائے پر مکمل یقین رکھتی ہے،گورنر بلوچستان امان اللہ خان یاسین زئی

کوئٹہ،22مارچ(اے پی پی):گورنربلوچستان امان اللہ خان یاسین زئی نے کہا ہے کہ صحافت ریاست کا چوتھا ستون ہے، موجودہ حکومت آزادی اظہار رائے پر مکمل یقین رکھتی ہے،صحافی حضرات کی اکثریت کا تعلق غریب گھرانوں سے ہے اور پیشہ ورانہ فرائض کی ادائیگی کے دوران کئی صحافی شہید بھی ہوچکے ہیں – ان خیالات کا اظہار انہوں نے بلوچستان یونین آف جرنلسٹ کی حلف برداری کی تقریب سے خطاب کرتے ہوئے کیا۔ گورنربلوچستان امان اللہ خان یاسین زئی نے نومنتخب بی یو جے کے عہدیداروں سے حلف لیا تقریب سے خطاب کرتے ہوئے گورنر بلوچستان امان اللہ خان یاسین زئی نے کہا کہ تمام صحافی حضرات قومی اور بین الاقوامی سطح پر ملک و صوبے کا مثبت امیج اجاگر کرنے میں اپنے حصے کا بھرپور کردار ادا کریں اور مجھے امید ہے کہ بلوچستان یونین آف جرنلسٹ کے نومنتخب عہدیداران صحافیوں اور میڈیا پرسنز کے حقوق واختیارات کا بہتر انداز میں دفاع کریں گے انہوں نے کہا کہ میڈیا پرسنز کا پل پل بدلتی دنیا کے تازہ ترین حالات واقعات سے باخبر رکھنے، عوام میں حقوق وفرائض کا احساس پیدا کرنے، حکومت اور عوام کے درمیان پل کا کردار ادا کر رہے ہیں، حکومت اور پریس تعلقات کے جو پہلے سے خوشگوار ہیں اب مزید ان کو مستحکم اور موثر بنانے کیلئے ٹھوس اقدامات کی ضرورت ہے، ٹیکنالوجی کی تیزرفتار ترقی اور خاص طور سے میڈیا پر اس کے اثرات نے اس صحافتی صنعت میں مقابلہ کے رحجان بڑھ گیا ہے اس لئے ضروری ہے کہ جدید ٹیکنالوجی سے استفادہ کریں بہت جلد ہم پیپرلیس فیوچر میں داخل ہونے والے ہیں جس میں ہم کاغذ وقلم کے کلچر سے نجات حاصل کریں گے لہٰذا سب کو ڈیجیٹل صحافت سے رشتہ جوڑنا پڑے گا_

گورنر بلوچستان نے نومنتخب عہداروں کو حلف لینے پر انہیں مبارکباد پیش کی۔ تقریب سے خطاب کرتے ہوئے پریس کلب کوئٹہ کے صدررضاالرحمن،نومنتخب صدر بی یوجے سلمان اشرف اور نومنتخب جنرل سیکریڑی فتح شاکر نے گورنر بلوچستان کو کوئٹہ پریس کلب آمد پر شکریہ ادا کیا تقریب میں بیوروچیف اور دیگر سینئر صحافیوں نے شرکت کی-