لاہور، 4 مارچ(اے پی پی): وزیر صحت ڈاکٹر یاسمین راشد نے محکمہ پرائمری اینڈ سیکنڈری ہیلتھ کئیرمیں ترقیاتی منصوبوں کے جائزہ اجلاس کی صدارت کی۔ ایڈیشنل سیکرٹری ڈاکٹر عمرفاروق نے وزیر صحت ڈاکٹریاسمین راشدکو وزیر اعظم صحت اقدامات کے تحت سرکاری ہسپتالوں کی ری ویمپنگ کی تفصیلات پیش کیں۔اجلاس میں صوبائی وزیر نے سرکاری ہسپتالوں کی ری ویمپنگ کو مقررہ وقت پر مکمل کرنے کی ہدایت کی ۔
صوبائی وزیر نے کہا کہ وزیر اعظم صحت اقدامات کے تحت پنجاب کے آٹھ اضلاع کے سرکاری ہسپتالوں کی ری ویمپنگ تیزی سے جاری ہے، سرکاری ہسپتالوں کے حالات بہترکرکے مریضوں کو صحت کی بہترسہولیات فراہم کرینگے، سرکاری ہسپتالوں کی ری ویمپنگ وقت کی اشدضرورت ہے۔انہوں نے کہا کہ اٹک،میانوالی،جھنگ،ڈی جی خان،چنیوٹ،لودھراں،قصوراور راجن پورکے سرکاری ہسپتالوں کو آٹھ ارب روپے کی خطیررقم سے ری ویمپ کیاجارہاہے، وزیراعظم عمران خان کے ویژن کے مطابق سرکاری ہسپتالوں میں مریضوں کو صحت کی بہترسہولیات فراہم کرنے کیلئے کوشاں ہیں۔
وزیر صحت ڈاکٹر یاسمین راشد نے کہا پنجاب کے سرکاری ہسپتالوں میں ڈاکٹرزکی کمی کوپوراکیاجارہاہے، وزیراعلی پنجاب سردارعثمان بزدار کی ہدایت پرتمام بنیادی مراکز صحت میں مریضوں کو24گھنٹے صحت کی بہترسہولیات فراہم کرنے جارہے ہیں، تمام سرکاری ہسپتالوں میں ڈاکٹرزکی حاضری،ادویات کی فراہمی اور بہترطبی سہولیات کو یقینی بنایاجارہاہے،سرکاری ہسپتالوں کی ری ویمپنگ کے ذریعے صحت سہولت کارڈزکے حامل خاندانوں کو بھی بہترطبی سہولیات میسرآسکیں گی۔
