استنبول، 27مارچ(اے پی پی):ترکی میں ہونے والی چوتھی اسپیکرز کانفرنس اختتام پذیر ہو گئی،پاکستان کی نمائندگی اسپیکر قومی اسمبلی اسد قیصر نے کی، کانفرنس میں “دہشتگردی کے خلاف جنگ اور علاقائی رابطے کو مضبوط” بنانے پر غور کیا گیا جبکہ اسپیکر کانفرنس میں افغانستان، چین ایران ،عراق اور پاکستان کے پارلیمانی وفود نے شرکت کی ۔
چوتھی اسپیکرز کانفرنس سے خطاب میں اسپیکر اسد قیصر نے مسئلہ کشمیر کے حل پر زور دیا اور کہا کہ بھارتی افواج مظلوم اور نہتے کشمیری عوام پر ظلم کر رہی ہے۔ انہوں نے کہا کہ اسلامو فوبیا کی وجہ سے امت مسلمہ کو سیکورٹی کے خطرات لاحق ہیں۔
اسپیکر قومی اسمبلی نے کہا کہ پاکستان نے دہشتگردی کے خلاف جنگ میں بہت قربانیاں دی ہیں، دہشتگردی کے خاتمے کے لیے پاکستان اپنا کردار جاری رکھے گا۔
کانفرنس کے بعد جاری مشترکہ اعلامیہ میں اس بات پر اتفاق کیا گیا کہ کشمیر تنازع سلامتی کونسل کی قراردادوں کے مطابق حل کیا جائے۔ اعلامیہ میں کہا گیا کہ عالمی اور علاقائی امن کیلئے مسئلہ کشمیر کا حل ناگزیر ہے جبکہ کانفرنس میں اس بات پر زور دیا گیا کہ تمام ریاستوں کو فنانشل ایکشن ٹاسک فورس کی سیاست سے گریز کرنا چاہیے جبکہ کانفرنس میں شامل ممالک ایف اے ٹی ایف پر یکجا موقف اپنائیں گے۔
اعلامیہ میں ترقی پذیر ممالک کے عوام کے لیے کووڈ 19 ویکسین کی با آسانی دستیابی پر زور دیتے ہوئے کہا گیا کہ ویکسین کی کمزور طبقات تک رسائی یقینی بنائی جائے۔
اسپیکر قومی اسمبلی اسد قیصر نے کانفرنس کے اختتام پر جلال الدین رومی اور حضرت شمس تبریزی کے مزار پر بھی حاضری دی۔
