لاہور،25مارچ(اے پی پی): ورلڈ ہیلتھ آرگنائزیشن کی جانب سے پنجاب حکومت کیلئے 8ایمبولینس اور15موٹر سائیکلوں کا عطیہ دیا گیا۔ وزیراعلی آفس میں ایمبولینس اور موٹر سائیکلیں پنجاب حکومت کے سپرد کرنے کی تقریب منعقد ہوئی۔ وزیراعلیٰ عثمان بزدار کوڈبلیو ایچ او کے کنٹری ہیڈ ڈاکٹر الپتھاماہی پالا نے ایمبولینس گاڑیوں کی چابیاں پیش کیں، وزیراعلیٰ نے ایمبولینس گاڑیوں اور موٹرسائیکلوں کامعائنہ بھی کیا۔
وزیر اعلیٰ پنجاب سردار عثمان بزدار نے کہا کہ ایمبولینس گاڑیاں کورونا کے مریضوں کو منتقل کرنے اور معمر شہریوں کو کورونا ویکسین لگانے کیلئے استعمال کی جاسکیں گی، جو مریض نقاہت کے باعث ہسپتال نہیں آسکیں گے ایمبولینس ان کے گھر تک پہنچے گی۔ انہوں نے کہا کہ موٹرسائیکل کے ذریعے کورونا ٹیسٹ کے سیمپل لیبارٹری پہنچائیں جاسکیں گے۔ ایمبولینس میں آکسیجن،دیگر آلات اورٹیسٹ سیمپل لیجانے کیلئے آئس باکس بھی موجود ہوں گے جبکہ لاہور ایئر پورٹ اور واہگہ بارڈر پر کورونا مریضوں کو ہسپتال منتقل کرنے کیلئے ایمبولینس بھی موجود ہوں گیں۔
وزیراعلیٰ نے ایمبولینس گاڑیاں اور موٹرسائیکلیں عطیہ کرنے پر ورلڈ ہیلتھ آرگنائزیشن کے تعاون کا شکریہ ادا کیا ۔ انہوں نے کہا کہ کورونا کے خلاف جنگ میں متحد اور یکسو ہوکرکاوشیں کرنا ہوں گی۔
صوبائی وزیر صحت ڈاکٹریاسمین راشد ،ڈبلیو ایچ او کے ہیڈ آف پنجاب ڈاکٹر جمشید احمد، ڈاکٹر یحییٰ اور متعلقہ حکام بھی اس موقع پر موجود تھے۔
