اسلام آباد،25مارچ(اے پی پی):وزارتِ خارجہ کا معاشی سفارت کاری کی جانب ایک اور اہم قدم ،وزارتِ خارجہ میں پاکستان اور ہنگری کے مابین تجارتی و اقتصادی ونڈو کا افتتاح کر دیا گیا۔
وزیر خارجہ مخدوم شاہ محمود قریشی اور ہنگری کے وزیر خارجہ پیٹر سجارتو نے (ویڈیو لنک کے ذریعے) بیک وقت ہنگری – پاکستان تجارتی و اقتصادی ونڈو اور پہلے ہنگری – پاکستان بزنس فورم میں مشترکہ طور پر شرکت کی۔
افتتاحی تقریب سے خطاب میں وزیر خارجہ شاہ محمود قریشی نے کہا کہ پاکستان، ھنگری کے ساتھ اپنے دو طرفہ تعلقات اور کثیرالجہتی شعبہ جات میں دو طرفہ تعاون کو خصوصی اہمیت دیتا ہے۔انہوں نے کہا کہ میں کرونا عالمی وبائی چیلنج کے باوجود اس پہلے پاکستان ہنگری تجارتی و اقتصادی ونڈو اور پہلے پاکستان – ہنگری بزنس فورم میں شرکت پر آپ سب کا شکر گزار ہوں، اس ونڈو کے کھلنے سے دونوں ممالک کے مابین تجارتی و اقتصادی تعاون کے فروغ میں اضافہ ہو گا۔
مخدوم شاہ محمود قریشی نے کہا کہ ہمیں خوشی ہے کہ ہنگری پاکستانی طلباء کو تعلیمی وظائف فراہم کر رہی ہے جس پر ہم ہنگری قیادت کے شکر گزار ہیں۔انہوں نے کہا کہ ہم پاکستان، ہنگری مشترکہ اقتصادی کمیشن کے دوسرے اجلاس کی میزبانی کے لئے تیار ہیں۔
وزیر خارجہ نے کہا کہ وزیر اعظم عمران خان کے وژن کے مطابق ہم اپنی جغرافیائی سیاسی ترجیحات کو جغرافیائی معاشی ترجیحات میں بدل رہے ہیں۔انہوں نے کہا کہ کاروبار میں سہولت کی عالمی درجہ بندی کے مطابق پاکستان کی رینکنگ میں 28 درجے بہتری آئی ہے جو ہماری مثبت اقتصادی پالیسیوں کا نتیجہ ہے۔
شاہ محمود قریشی نے کہا کہ پاکستان اور ہنگری کے مابین توانائی، متبادل توانائی، انفارمیشن ٹیکنالوجی، فوڈ اور سیاحت کے شعبے میں دو طرفہ تعاون بڑھانے کے وسیع مواقع موجود ہیں ،دونوں ممالک کے مابین اعلیٰ سطحی روابط کا فروغ، دو طرفہ تجارت کے حجم میں اضافے کا موجب بن سکتا ہے۔
اس موقع پر ہنگری کے وزیر خارجہ نے کہا کہ ہنگری کی بڑی فوڈ، ٹیکنالوجی، میڈیکل اور آئی ٹی کے شعبے سے وابستہ کمپنیاں پاکستان میں سرمایہ کاری کا ارادہ رکھتی ہیں، فوڈ سیکورٹی کے حوالے سے دو طرفہ تعاون کے فروغ کیلئے ہماری زرعی یونیورسٹی، پاکستان کی ایگریکلچر کونسل کے ساتھ رابطے میں ہیں۔
ہنگری کے وزیر خارجہ نے مختلف شعبوں میں دو طرفہ تعاون کے فروغ کے حوالے سے وزیر خارجہ مخدوم شاہ محمود قریشی کی کاوشوں پر ان کا شکریہ ادا کیا
وزیر خارجہ مخدوم شاہ محمود قریشی نے ہنگری کے وزیر خارجہ پیٹر سجارتو کو دورہ ء پاکستان کی دعوت دی جو انہوں نے خوشی اور شکریہ کے ساتھ قبول کی اور کہا کہ وہ ایک بڑے کاروباری حضرات پر مشتمل وفد کے ہمراہ جلد پاکستان تشریف لائیں گے۔
اے پی پی/حمزہ/قرۃالعین
