لاہور 28 اپریل(اے پی پی): وزیراعلی پنجاب کی ہدایت پر صوبائی وزیر صنعت و تجارت میاں اسلم اقبال نے آکسیجن بنانے والی کمپنیوں کے حکام سے سول سیکرٹریٹ میں ملاقات کی۔ اس ملاقات میں آکسیجن کی پیداوار و کھپت، ہیلتھ سیکٹر کو فراہمی کے درپیش مسائل، دستیاب سٹاک اور آکسیجن مینو فیکچرز نے ٹیچنگ ہسپتالوں سے واجبات کی ادائیگی، آکسیجن کے ٹرانسپورٹ ٹینکرزکو موٹر وے پر اجازت، آکسیجن وہیکل کو ریلیف کی فراہمی اور دیگر مسائل سے صوبائی وزیر کو آگاہ کیا گیا۔ اس کے علاوہ آکسیجن مینو فیکچرز نے ٹیکسوں اور الیکٹریسٹی ٹیرف میں ریلف کا بھی مطالبہ کیا جس پر صوبائی وزیر میاں اسلم اقبال نے آکسیجن مینو فیکچرز کومسائل کے حل اور ہر ممکن تعاون کی یقین دہانی کرواتے ہوئے کہا کہ کرونا وبا کی شدت سے زندگی کا ہر شعبہ متاثر ہوا ہے، پنجاب حکومت لوگوں کی زندگیوں اوران کے کاروبار کے تحفظ کیلئے ہر ضروری اقدامات اٹھا رہی ہے، آکسیجن مینو فیکچرز کمپنیوں کی پیداواری صلاحیت بڑھانے کے لئے ہر ممکن سہولت دیں گے اور آکسیجن مینو فیکچرز اپنی سفارشات بھجوائیں، جن کی روشنی میں مزید اقدامات کئے جائیں گے۔
انہوں نے کہا کہ خدانخواستہ کرونا مزید پھیلا تو آکسیجن کا استعمال بڑھنے سے پروسیسنگ انڈسٹری کو آکسیجن کی فراہمی بند کرنا پڑ سکتی ہے۔
آکسیجن مینو فیکچرز نے ٹیچنگ ہسپتالوں میں گیس سٹاک کی کیپسٹی بڑھانے کی تجویز بھی پیش کی اور کہا کہ انسانی جانوں کا تحفظ قومی فریضہ ہے ہم ہر ممکن تعاون کیلئے تیار ہیں۔
