کوئٹہ، 21 اپریل (اے پی پی): پارلیمانی سیکرٹری صحت ڈاکٹر ربابہ خان بلیدی نے بتایا ہے کہ بلوچستان میں آج سے 50 تا 59 سال کی عمر کے افراد کو کورونا وائرس سے بچاؤ کی ویکسین لگانے کا عمل شروع کر دیا گیا ہے۔ این سی او سی نے بلوچستان کے لئے 50 تا 59 سال کی عمر کے افراد کے لئے طے شدہ شرائط میں خصوصی رعایت دی ہے جس کے تحت ایسے افراد کو پیشگی رجسٹریشن سے مستثنی قرا دیا گیا ہے اور ان کی کوویڈ ویکسین رجسٹریشن اسی وقت متعلقہ سنٹر پر ہی بلا تاخیر کی جائے گی۔
پارلیمانی سیکرٹری صحت نے کہا کہ 50 سے 59 سال کی عمر کے افراد کسی بھی نزدیکی ویکسینیشن سینٹر پر تشریف لاکر ان حکومتی اقدامات سے استفادہ کرسکتے ہیں ۔دونوں ڈوز کی تکمیل پر مصدقہ ویکسین سرٹیفکیٹ بھی مہیا کیا جائے گا ۔انہوں نے کہا کہ کورونا وائرس کی جان لیواءوباءسے بچاؤکے لئے بلوچستان میں مرحلہ وار ایج گروپ کے مطابق اسٹریٹیجی پر عمل درآمد کیا جارہا ہے۔ حکومت بلوچستان کی جانب سے عوام کو کورونا وائرس سے بچاؤ کی ویکسین مقرر کردہ ویکسینیشن مراکز پر بلا معاوضہ فراہم کی جاررہی ہے۔
