کراچی، 23 اپریل(اے پی پی ): صدر مملکت ڈاکٹر عارف علوی نے کہا ہے کہ حکومت عوام کے مسائل کے خاتمہ کے لئے ہر ممکن اقدامات کر رہی ہے، عوامی فلاح وبہبود کے لئے شروع کئے گئے کئی منصوبے اس بات کا ثبوت ہیں ۔
ان خیالات کا اظہار صدر مملکت نے جمعہ کو یہاں گورنر سندھ عمران اسماعیل سے گورنر ہاؤس میں ملاقات کے دوران گفتگو کرتے ہوئے کیا ، ملاقات میں صوبے کے لئے وفاقی حکومت کی جانب سے شروع کیے گئے ترقیاتی منصوبوں اور عوامی فلاح و بہبود کے اقدامات اور باہمی دلچسپی کے دیگر امور سمیت صوبہ کی مجموعی صورتحال پر تبادلہ خیال کیا گیا ۔
صدرِ مملکت ڈاکٹر عارف علو ی نے کہا کہ عوام کے مسائل کے حل کے لئے تمام سیاسی نمائندوں کو ذمہ داری کا مظاہرہ کرنا ہو گا۔
گور نر سندھ نے کہا کہ صوبے کے عوام کی ترقی اور خوشحالی وزیراعظم کی ترجیحات میں شامل ہے، صوبے کے مسائل کا حل باہمی گفت وشنید اور افہام و تفہیم سے ممکن بنایا جا رہا ہے۔
