لاہور،23اپریل(اے پی پی): وزیراعلیٰ پنجاب سردار عثمان بزدار نے کہا ہے کہ معیشت مضبوط کرنے کے لئے زمین میں چھپے خزانے بروئے کارلانا ضروری ہے، شعبہ معدنیات کو پائیدار بنیادوں پر فروغ دینے کیلئے اصلاحات متعارف کرائی گئی ہیں ۔
ان خیالات کا اظہار وزیراعلیٰ پنجاب سردار عثمان بزدار نے شعبہ معدنیات کے محکمانہ امور کے حوالے سے اعلیٰ سطحی اجلاس کی صدارت کرتے ہوئے کیا ، اجلاس سے خطاب کرتے ہوئے وزیر اعلی پنجاب کا کہنا تھا کہ پنجاب کی تاریخ میں پہلی بار شعبہ معدنیات کو جدید خطوط پر استوار کیا جا رہا ہے۔
عثمان بزدار نے کہا کہ ہماری حکومت نے اس سیکٹر پر خصوصی توجہ دی ہے ، کانوں کی لیز کے حوالے سے یکساں پالیسی اپنائی گئی ہے۔ انھوں نے کہا کہ معدنیات کے شعبے کے پوٹینشل سے بھرپور استفادہ کیا جائے گا- مقامی معدنیات کے استعمال سے انڈسٹری کو فروغ اور روزگار کے مواقع میسرہوں گے- انھوں نے کہا کہ مائننگ کے شعبہ سے وابستہ افراد کو ہر ممکن سہولتیں دیں گے۔
انہوں نے کہا کہ سابق دور میں مائنز اینڈ منرل سیکٹر کو بھی شوبازی کی نذر کیا گیا، بڑے بڑے دعوے کئے گئے لیکن ایک پائی کا بھی فائدہ نہ ہوا-
