ملتان،11اپریل(اے پی پی):ڈپٹی کمشنر علی شہزاد نے کہا ہے کہ رمضان بازاروں میں چینی 65 روپے جبکہ اوپن مارکیٹ میں85 روپے فی کلو کے حساب سے فروخت ہوگی اور کہاحکومت رمضان بازاروں میں چینی پر 20 روپے فی کلو سبسڈی دے رہی ہے۔
اتوار کو یہاں پرائس مجسٹریٹس کے اجلاس سے خطاب میں ڈپٹی کمشنر نے کہا کہ اوپن مارکیٹ میں چینی مہنگے داموں فروخت کرنے والوں کو جیل بھیجا جائے گا۔انہوں نے پرائس مجسٹریٹس کو چینی کی گرانفروشی میں ملوث عناصر کے خلاف کریک ڈاون کی ہدایت دی اور کہا کہ اوپن مارکیٹ میں فی کلو چینی پر 85 روپے سے ایک پیسہ بھی کوئی زائد قیمت وصول کرے تو موقع پر گرفتار کر لیا جائے۔
علی شہزاد نے کہا کہ رمضان بازاروں میں 10 کلو وزن کے آٹے کا تھیلا 375 روپے میں فروخت کیا جائے گا ، حکومت10 کلو آٹے کے ایک بیگ پر65 روپے سب سڈی دے رہی ہے۔انہوں نے کہا قیمت زیادہ وصول کرنے کیخلاف کریک ڈاون کاآغاز بڑے مالز اور ڈیپارٹمنٹل سٹورز سے کیا جائے، چینی کی قیمتوں کے حوالے سے حکومت نے زیرو ٹالرنس پالیسی اپنانے کی ہدایت کی ہے۔
ڈپٹی کمشنر نے کہا کہ حکومت ناجائز منافع خوروں کو یہ پیغام دینا چاہتی ہے کہ قیمتیں کنٹرول کرنے کا قانون اور میکانزم موجود ہے۔انہوں نے کہا رمضان بازاروں میں متوقع رش کے پیش نظر چینی اور آٹے کے سٹال کیلئے مناسب جگہ کا انتخاب کیا جائے اور ہر رمضان بازار کے مقررہ اوقات میں پرائس مجسٹریٹ ڈیوٹی پر موجود رہے۔
ڈپٹی کمشنر کی ناقص کارکردگی پر متعدد پرائس مجسٹریٹس کو شوکاز نوٹس جاری کر نے کی ہدایات جاری کی۔
اجلاس میں اے ڈی سی ریونیو محمد طیب خان اور اے سیز خواجہ محمد عمیر محمود اور محمد زبیر ، سب رجسٹرار محسن نثار اور سیکرٹری آر ٹی اے رانا محسن جبکہ اے ڈی سی جی قمرالزمان قیصرانی، اے سیز آبگینے خان اور مدثر ممتاز ویڈیو لنک کے ذریعے اجلاس میں شریک ہوئے۔
