اسلام آباد،19اپریل(اے پی پی):صدر مملکت ڈاکٹرعارف علوی نے کہا ہے کہ ملک میں روزگار کے مواقع پیدا کرنے اور زرِمبادلہ کے لئے ڈیری سیکٹر کو فروغ دینے کی ضرورت ہے، ڈیری صنعت کو جدید خطوط پرمستحکم اور ترقی دینے کی ضرورت ہے ۔ان خیالات کا اظہار انہوں نے پیر کو ایوان صدر میں سید حسن رضا کی قیادت میں ڈیری انڈسٹری کے وفد سے گفتگو کرتے ہوئے کیا۔
انہوں نے کہا کہ ڈیری کے شعبے نے ملکی معیشت کی ترقی میں اہم کردار ادا کیا ہے۔صدر مملکت نے ڈیری پروڈیوسراور پراسیسر کو مناسب ماحول کی فراہمی پر حکومتی تعاون کا یقین دلایا۔انہوں نے کہا کہ حکومت نے معاشی نمو بڑھانے ، غذائی تحفظ یقینی بنانے اور غربت کے خاتمے کے لئے اس شعبے پر توجہ دی ، ڈیری شعبے سے وابستہ افراد کو ہنر مندبنانےاور جدید تکنیک بارے آگاہی پیدا کرنے کی ضرورت ہے۔
صدر مملکت نے کہا کہ سٹیک ہولڈرز ڈیری سیکٹر کی ترقی کے لئے قومی حکمت عملی اور مستقبل کی پالیسی تیار کریں ۔
