اسلام آباد,11اپریل (اے پی پی):وزیر اعظم عمران خان نے احساس لنگر خانوں اور “کوئی بھوکا نہ سوئے” پروگرام میں سیلانی ٹرسٹ کی خدمات کو سراہتے ہوئے پروگرام کو وسعت دینے کے لیے حکومت کی طرف سے ہر ممکن سہولت مہیا کرنے کی یقین دہانی کرائی ہے ۔انہوں نے یہ یقین دہانی اتوار کو سیلانی ٹرسٹ کے وفد سے گفتگو کرتے ہوئے کیا جس نے اسلام آباد میں ان سے ملاقات کی،سیلانی ٹرسٹ کے وفد میں بشیر فاروق، افضل چمڈیا، منظر عالم، فرخ امین، عرفان واحد، سلمان اقبال، امتیاز حسین اور یوسف لاکھانی شامل تھے،اس موقع پر رکن قومی اسمبلی فرخ حبیب بھی موجود تھے۔سیلانی ٹرسٹ نے وزیر اعظم کے احساس “کوئی بھوکا نہ سوئے” اقدام کا بھر پور خیر مقدم کیا اور ملک کے مختلف شہروں میں اس پروگرام کے دائرہ کار کو وسعت دینے کی پیشکش کی۔وزیر اعظم نے احساس لنگر خانوں اور “کوئی بھوکا نہ سوئے” پروگرام میں سیلانی ٹرسٹ کی خدمات کو سراہا اور اس پروگرام کو وسعت دینے کے لیے حکومت کی طرف سے ہر ممکن سہولت مہیا کرنے کی یقین دہانی کرائی۔
