گلگت۔30اپریل (اے پی پی):وزیر اعظم عمران خان نے کہا ہے کہ گلگت بلتستان میں سیاحت کے بے پناہ مواقع موجود ہیں جن سے کثیر زرمبادلہ حاصل ہو گا اور معیشت مستحکم ہو گی۔ ان خیالات کا اظہار انہوں نے جمعہ کو گلگت کے دورہ کے دوران وزیراعلیٰ گلگت بلتستان کی طرف سے سیاحت کے فروغ اور اس حوالہ سے کئے گئے اقدامات کے بارے میں دی گئی بریفنگ کے موقع پر کیا۔ وزیر اعظم عمران خان کو ڈائریکٹر جنرل اسپیشل کمیونیکیشن آرگنائزیشن (ایس سی او) کی طرف سے بھی بریفنگ دی گئی۔ وزیر اعظم نے ایس سی او کے زیر انتظام منصوبوں کا افتتاح کیا جن میں سی پیک خنجر اب تا راولپنڈی آپٹک فائبر کیبل کا پہلا مرحلہ، گلگت بلتستان کے 39 مقامات میں گھروں تک آپٹک فائبر تار کی رسائی، ایس سی او کے اشتراک سے قراقرم یونیورسٹی میں انکیوبیشن سنٹر کا قیام، معروف کوہ پیما مرحوم علی سدپارہ کی یاد میں K-2 بیس کیمپ پر جدید ٹرانسیور اسٹیشن کا قیام اور گلگت بلتستان کے دور دراز علاقوں میں رابطہ کے لئے VSAT حب کا قیام شامل ہیں۔ وزیر اعظم نے آپٹک فائبر کیبل کے دوسرے مرحلے اور ہنزہ میں سافٹ وئیر ٹیکنالوجی پارک کے قیام کا سنگ بنیاد بھی رکھا -وزیر اعظم کو احساس پروگرام کے تحت گلگت بلتستان میں جاری امدادی منصوبوں اور مستقبل کے لئے منصوبہ بندی پر معاون خصوصی ڈاکٹر ثانیہ نشتر نے بریفنگ دی ۔وزیر اعظم کو بتایا گیا کہ فی الوقت گلگت بلتستان کے3 اضلاع میں احساس نشوونما مراکز قائم ہو چکے ہیں، گلگت بلتستان کے تمام اضلاع میں احساس کے پرائمری تعلیمی وظائف کے ساتھ ساتھ ثانوی تعلیمی وظائف کا پروگرام بھی شروع کیا جا رہا ہے۔وزیراعظم کی معاون خصوصی برائے سماجی تحفظ و تخفیف غربت ڈاکٹر ثانیہ نشترنے وزیراعظم کو بتایا کہ احساس کے ثانوی تعلیمی وظائف کا آغاز رواں سال جولائی سے ہوگا، پہلے مرحلے میں احساس ون وومن ون اکاؤنٹ اقدام کا آغاز ملک کے تمام صوبوں کے13 اضلاع سے کیا جا رہا ہے، احساس ون وومن ون اکاؤنٹ کے تحت ہر کفالت صارف کو بچت بینک اکاؤنٹ فراہم کیا جا رہا ہے۔ وزیر اعظم نے اس موقع پر گلگت بلتستان بھر کے لئے احساس نشوو نما، احساس ثانوی تعلیم وظائف اوراحساس “ایک عورت- ایک اکاونٹ” کا اجراکیا۔وزیر اعلی گلگت بلتستان نے وزیر اعظم کو گلگت بلتستان میں سیاحت کے فروغ اور اس حوالے سے لئے گئے اقدامات کے بارے بریف کیا۔ وزیر اعظم نے اس موقع پر کہا کہ گلگت بلتستان میں سیاحت کے فروغ کےبھر پور مواقع موجود ہیں جن سے کثیر زر مبادلہ حاصل ہوگا اور مقامی معیشت مستحکم ہوگی۔ وزیر اعظم نے تاکید کی کہ سیاحت کے منصوبوں میں ماحولیات کے تحفظ کا خاص خیال رکھا جائے۔وزیر اعظم نے گلگت بلتستان حکومت کے ویب پورٹل، چیف منسٹر ٹاسک مینجمنٹ سسٹم اور چیف منسٹر کمپلینٹ مینجمنٹ سسٹم کا افتتاح بھی کیا۔ اس سسٹم کے اجرا سے عوامی شکایات کے جلد ازالے میں مدد ملے گی اور سرکاری کارروائی میں جدت اور محکموں کے درمیان رابط کاری مستحکم ہوگی۔
