سیالکوٹ، 4اپریل ( اےپی پی): معاون خصوصی وزیر اعلیٰ پنجاب برائے اطلاعات ڈاکٹر فردوس عاشق اعوان نے کہا ہے کہ ایسٹر کے پُرمسرت موقع پر مسیحی برادری کو دل کی اتھاہ گہرائیوں سے مبارک باد پیش کرتی ہوں،پاکستان میں بسنے والی مسیحی کمیونٹی بین المذاہب ہم آہنگی کا حسین مظہر ہے وطن عزیز میں قومی یکجہتی کو پروان چڑھانے میں مسیحی کمیونٹی اپنا بھرپورکردار ادا کررہی ہے۔ پاکستان میں بسنے والی تمام اقلیتوں کو مکمل مذہبی آزادی اور حقوق حاصل ہیں اقلیتوںکو مین اسٹریم کا حصہ بنایا جارہا ہے،سرکاری اداروں میں جاب کیلئے 5فیصد کوٹہ مختص کیا گیا ہے جس کے تحت19ہزار سرکاری نوکریاں اقلیتوں کو دینے جارہے ہیں۔مسیحیوں برادری کی چرچز میں ہونے والی شادیوں کو نادرا کے اندراج کا آغاز کیا جارہاہے جبکہ2فیصد ہائیر ایجوکیشن میں کوٹہ دیکر اقلیتی قابل طالب کی حوصلہ کیلئے مختص کیا ہے اس کے علاوہ یوحنا آباد کو 30کروڑ روپے کی لاگت سے ماڈل سوسائٹی میں بدلنے جارہے ہیں۔زبردستی مذہب کی تبدیلی کے رجحان کی حوصلہ شکنی کیلئے قانون سازی کی جارہی ہے ، اقلیتوں کے حقوق کا تحفظ یقینی بناناحکومت کی اولین ذمہ داری ہے۔قائد اعظم نے اقلیتوں کے ساتھ جو وعدوں کیے ان کو پورا کرنے جارہے ہیںاس کے برعکس بھارت میں مودی کی ہٹ دھرمی نے اقلیتوں کو دیوار کے ساتھ لگایا ہوا ہے۔بالخصوص کشمیری بہن بھائی کا قاتل عام اور زندگی تنگ کی جارہی ہے لیکن کشمیری حق کے ساتھ استقامت کے ساتھ کھڑے ہیں ان کے حوصلے کو سلام پیش کرتے ہیں ۔ ان خیالات کا اظہار انہوں نے ڈی سی آفس کمیٹی روم سیالکوٹ میں مسیحی کمیونٹی میںچیکس تقسیم کرنے اور ایسٹر کے کیک کاٹنے کے سلسلہ میں منعقدہ تقریب سے خطاب کرتے ہوئے کیا۔ صدرسنٹرل پنجاب اقلیتی ونگ جان محبوب، پادری شمشاداوروائس چیئرمین ضلعی امن کمیٹی سیالکوٹ اصغر علی چیمہ بھی موجود تھے ۔ ڈاکٹر فردوس عاشق اعوان نے کہاکہ پنجاب روزگار اسکیم کے تحت وزیر اعلی عثمان بزدار 2کروڑ سے زائد نوجوانوں کوبااختیار بنانے جارہے ہیں،بینک آف پنجاب اس اسکیم میں اہم کردار کررہا ہے۔انہوں نے کہاکہ دنیا بھر میں ان لائن خرید و فروخت کا کاروبار عروج پر ہے۔ خواتین کیلئے آن لائن ڈیجیٹل مارکٹنگ کیلئے پنجاب روزگار اسکیم کے تحت ونڈو اوپن کرنے جارہے ہیں۔ ڈاکٹر فردوس عاشق اعوان نے کہاکہ ضلع سیالکوٹ میں 10کورونا ویکسی نیشن سنٹر قائم کئے گئے ہیںاورضلع سیالکوٹ میں 7ہزار295بزرگ شہریوں اور6ہزار 385فرنٹ لائن ہیلتھ ورکرز کی بھی ویکسی نیشن کا عمل مکمل کرلیا گیا۔انہوںنے کہا کہ صوبہ بھر میں ساڑھے 4لاکھ بزرک شہریوں کو پہلی ڈوز لگائی جاچکی اس سلسلہ میںصوبہ پنجاب میں کل 126ویکسی نیشن سنٹرز کام کررہے ہیں۔گذشتہ3روزکے دوران ضلع سیالکوٹ کورونا پازیٹو کا تناسب 18فیصد تک جاپہنچا ہے ۔انہوںنے کہاکہ کورونا پر قابو پانے کیلئے کورونا ایس او پیز پر سختی سے عملدرآمد کروایا جارہا ہے۔ویکسی نیشن کے پراسس کو آگے بڑھانا ہے۔انہوںنے کہا کہ سماجی فاصلوں کو یقینی بنانے کیلئے میڈیا کو اپنا کردار ادا کرنا ہوگا۔ڈاکٹر فردوس عاشق اعوان نے این اے 75سیالکوٹ کے ضمنی انتخاب کے بارے گفتگو کرتے ہوئے کہاکہ ڈسکہ کے الیکشن کو متنازعہ بنانے کیلئے ن لیگ کی شازشیں رنگ لائی ہیںکمشنر, آر پی او, ڈی سی اور ڈی پی اوز سمیت تمام ضلعی افسران تبدیل ہوئے لیکن آر او تبدیل نہیں ہوئے جس کی ذمہ داری تھی۔الیکشن کمیشن کی ذمہ داری ہے کہ وہ غیر جانبدارانہ اور شفاف بنائے اورالیکشن کمیشن کے ساتھ ہر طرح کے تعاون کیا جائے گا۔ آراو نے آج تک کسی اپوزیشن لیڈر کو نوٹس جاری نہیں کرسکے۔آر او اور اس کے عملے کی ذمہ داری کس نے ادا کرنی ہے۔الیکشن کمیشن کی جانب سے ملنے والی ہدایات پر صوبائی حکومت مکمل معاونت کیلئے تیار ہیں۔
