اسلام آباد ،19 اپریل (اے پی پی ): پاکستان ہیومنیٹیرین فورم نے انسانی امداد اور ترقیاتی پروگراموں سے متعلق سالانہ رپورٹ شائع کر دی ہے جس میں بتایا گیا کہ گزشتہ سال 2020 میں 25 بلین روپوں کے ترقیاتی منصوبوں کے ذریعے ملک بھر کے مختلف اضلاع کے 25 ملین سے زائد افراد کو فائدہ پہنچا۔سالانہ رپورٹ میں بتایا گیا کہ پاکستان ہیومنیٹیرین فورم نے 38 بین الاقوامی این جی اوز کے ذریعے ان منصوبوں کو نافذ کیا اور گورنمنٹ آف پاکستان کی خدمات بھی حاصل کی گئیں ۔ سال 2020 میں 10 سے زیادہ اقسام کی قدرتی آفات میں لوگوں کی مدد کی گئی جن میں بالخصوص کورونا وائرس شامل تھا۔
سالانہ رپورٹ شائع کرنے سے متعلق سیمینار کا انعقاد پیر کو یہاں ہوا جس میں حکومت پاکستان اور بین الاقوامی این جی اوز کے نمائندوں نے شرکت کی ۔پی ایچ ایف نے مختلف دیہی علاقوں میں مختلف ترجیحات پر کام کیا جن میں قدرتی آفات سے نمٹنا، انسانی ضروریات کو پورا کرنا، صحت، خوراک، لائیولی ہوڈ، غذا، تعلیم، خواتین کی ترقی، غربت میں کمی، معاشی استحکام، ماحولیاتی تبدیلی،کمیونیٹی کی شمولیت، قدرتی وسائل کا انتظام، کورونا وائرس سے بچاؤ شامل ہیں۔
سیمینار میں سید شاہد کاظمی، کنٹری کو آرڈینیٹر پاکستان ہیومنیٹیرین فورم، فرحان احمد خان، کنٹری ڈائریکٹر سیسوی پاکستان، بارنارڈ جیسپرزفیجر، یورپین یونین، جولین ہارنیس یو این ریزیڈنٹ کوآرڈینیٹر،لیفٹیننٹ جنرل ریٹائرڈ عمر محمودحیات، عابد سلہری، ایگزیکٹو ڈائریکٹر ایس ڈی پی آئی،ادریس محسود ممبر ڈی آ ر آر، این ڈی ایم اے اور دیگر اداروں کے نمائندون نے شرکت کی۔
