لاہور، 18مئی (اے پی پی): وزیراعلیٰ عثمان بزدار نے پنجاب میں سمگلنگ روکنے کے لئے موثر اقدامات کرنے کی ہدایت کرتے ہوئے کہا کہ سمگلنگ روکنے کے لئے متعلقہ اداروں کو موثر بنایا جائے، جیلوں میں قیدیوں کی سہولت کے لئے ہر ممکن اقدام اٹھایاجائے، قیدی بھی انسان ہیں انہیں بھی حقوق حاصل ہیں۔
ان خیالات کا اظہار وزیر اعلیٰ پنجاب سردار عثمان بزدار نے منگل کو یہاں وزیراعلیٰ آفس میں محکمہ داخلہ پنجاب کی کارکردگی سے متعلق اجلاس کی صدارت کر تے ہوئے کیا،اجلاس میں محکمہ داخلہ کی کارکردگی او رمستقبل کے اہداف کا تفصیلی جائزہ لیا گیا۔
وزیراعلیٰ عثمان بزدار نے محکمہ داخلہ کی کارکردگی پر اطمینان کااظہار کیا اور مستقبل کے اہداف کو حاصل کرنے کے لئے مزید محنت سے کام کرنے کی ہدایت کرتے ہوئے کہا کہ پنجاب کی 7جیلوں میں ملٹی سٹوری بیرکس بنائی جائیں گی، ملٹی سٹوری بیرکس میں 10ہزار قیدیوں کی گنجائش ہوگی۔انہو ں نے کہا کہ سزا وجزا کے بغیر کوئی نظام آگے نہیں بڑھ سکتا، اڑھائی برس میں پنجاب کی مختلف جیلوں میں کرپشن اور فرائض سے غفلت برتنے پر 1319 ملازمین کے خلاف کارروائی کی گئی ہے، میانوالی میں ہائی سکیورٹی جیل کا سول ورک مکمل ہوچکا ہے، لودھراں میں نئی جیل تعمیر ہوچکی ہے، پنجاب کی 21جیلوں میں پریزنرز مینجمنٹ انفارمیشن سسٹم کا آغاز کردیا گیاہے۔
وزیر اعلیٰ نے کہا کہ جیلوں میں کورٹ رومز کا قیام بھی عمل میں لایا گیاہے، ساہیوال میں چائلڈ پروٹیکشن انسٹی ٹیوٹ مکمل ہوچکا ہے،11 شہرو ں میں چائلڈ پروٹیکشن یونٹس بنائے جائیں گے، بلوچ لیویز کا دائرہ کار راجن پور تک بڑھا دیا گیا ہے، بارڈر ملٹری پولیس اور بلوچ لیویز میں بھرتیوں کی منظوری بھی دی جاچکی ہے جبکہ قبائلی علاقوں میں نئی چیک پوسٹیں اور تھانے بھی قائم کر رہے ہیں۔
وزیراعلیٰ پنجاب سردار عثمان بزدار نے ہر محکمے کی کارکردگی کا جائزہ لینے کا فیصلہ کر لیا ہے،محکموں کے سیکرٹریز اڑھائی سال میں کئے گئے اقدامات اور آئندہ کے لائحہ عمل کے بارے میں بریفنگ دیں گے ۔
