پشاور، 20 مئی(اے پی پی): خیبرپختونخوا میں سرمایہ کاری اور کاروباری سرگرمیوں کے فروغ کے لیے انویسمنٹ پروموشن سٹریٹیجی متعارف کرالی گئی ہے۔ انویسمنٹ پروموشن سٹریٹیجی25 – 2021کی افتتاحی تقریب محکمہ خزانہ سول سیکرٹریٹ پشاور میں ہوئی جس کے مہمان خصوصی صوبائی وزیر صحت و خزانہ تیمور سلیم خان جھگڑا اور وزیراعلیٰ کے معاون خصوصی برائے صنعت و تجارت عبدالکریم خان تھے۔
اجلاس میں صوبے میں سرمایہ کاری اور کاروباری و صنعتی ترقی کی سرگرمیوں کو فروغ دینے کے حوالے سے اقدامات پر بات چیت کی گئی۔اس موقع پر صوبائی وزیر صحت و خزانہ تیمور سلیم جھگڑا کا کہنا تھا کہ خیبرپختونخوا میں سرمایہ کاری اور کاروبار کے لیے بہترین مواقع موجود ہیں۔ انویسمنٹ پروموشن سٹریٹیجی سے صوبے میں مزید سرمایہ کاروں کو یہاں سرمایہ کاری کے لیے راغب کیا جائے گا۔سٹریٹیجک انویسمنٹ پالیسی سے صوبے میں سرمایہ کاری کو فروغ ملے گا اور خوشحالی کے نئے دور کا آغاز ہوگا۔
انہوں نے کہا کہ انویسمنٹ پروموشن سٹریٹیجی سے صوبے میں نجی شعبے کے لیے سرمایہ کاری کی راہ مزید آسان کر رہے ہیں جس سے روزگار کے نئے مواقع پیدا ہوں گے۔ صوبے میں صنعتی ترقی کو بھی فروغ دیا جا رہا ہے اور اس مقصد کے لیے خاطر خواہ اقدامات اٹھائے گئے ہیں۔ سرمایہ کاروں کے لیے انویسمنٹ منیجمنٹ سسٹم اور ون ونڈو آپریشن شروع کردیا ہے۔ تیمور جھگڑا نے کہا کہ دس پندرہ سال پہلے دہشتگردی کا شکار صوبہ آج پورے ملک کو ترقی کا پیغام دے رہا ہے۔ عالمی ادارے کی رپورٹ کے مطابق گزشتہ 7 سالوں میں خیبر پختونخوا میں تمام صوبوں سے زیادہ ہیومین ڈویلپمنٹ ہوئی جو کہ ایک اعلیٰ مثال ہے۔صوبائی وزیر نے کہا کہ خیبرپختونخوا کے شہریوں میں محنت اور مشکل حالات کا مقابلہ کرنے کا حوصلہ موجود ہے۔
اس موقع پر وزیراعلیٰ خیبرپختونخوا کے معاون خصوصی برائے صنعت و تجارت عبدالکریم خان کا کہنا تھا کہ صوبے میں 7 بڑے اور 9 چھوٹے صنعتی زون بنا رہے ہیں۔ انویسمنٹ پروموشن سٹریٹیجی کے ذریعے ملکی اور غیر ملکی سرمایہ کاروں کو یہاں سرمایہ کاری میں آسانی ہو گی۔
اس موقع پر بورڈ آف انویسمنٹ اینڈ ٹریڈ کے پارٹنر اداروں کے نمائندوں نے بھی خطاب کیا اور انویسمنٹ پروموشن سٹریٹیجی کے حوالے سے اپنے خیالات کا اظہار کیا۔اس موقع پر خیبرپختونخوا بورڈ آف انویسمنٹ اینڈ ٹریڈ کے سی ای او حسن داؤد بٹ، یو کے ایڈ،آئی ایف سی اور دیگر پارٹنر ادارے کے عہدیداران بھی موجود تھے
