لاہور، 19مئی (اے پی پی): وزیر اعلی پنجاب سردار عثمان بزدار نے کہا کہ سڑکوں اور عمارتوں کی تعمیر میں جدید تکنیک اپنانے کے منصوبے پر کام اور سی اینڈ ڈبلیو کی استعداد کار میں اضافے کے لئے سپیشل پراجیکٹ یونٹ کے قیام کا فیصلہ ہو چکا ہے، پنجاب آرکیٹیکچر ڈیپارٹمنٹ میں پروفیشنلز کی کمی پوری کرنے کے لئے محکمہ تعمیرات و مواصلات میں ضروری خالی آسامیوں پر ایڈہاک بھرتیوں کی منظوری دے دی گئی ہے۔
ان خیالات کا اظہار وزیراعلیٰ عثمان بزدار نے محکمہ تعمیر ات و مواصلات کی کارکردگی اورفیوچر پلان سے متعلق اہم اجلاس کی صدارت کرتے ہوئے کیا۔اجلاس میں محکمے کی کارکردگی اور آئندہ کے لائحہ عمل کاجائزہ لیا گیا۔وزیر اعلیٰ نے کہا کہ لاہور رنگ روڈ اتھارٹی کو پنجاب رنگ روڈ اتھارٹی بنانے اور دائرہ کار وسیع کرنے کا فیصلہ کیا گیا ہے اور شاہراہوں کی حدود میں غیر قانونی عمارتیں اور ہاؤسنگ سکیمیں بنانے پر قانونی کارروائی کی جائے گی اور کسانوں کی فلاح و بہبود کے لئے آر اے پی کے تحت کھیت سے منڈی تک سڑکوں کی تعمیربھی مقررہ مدت میں یقینی بنائی جائے گی،چھوٹی سڑکوں پر ہیوی ٹریفک روکنے کے لئے آگاہی بورڈ لگائے جائیں ۔
وزیر اعلی نے ایم ایم روڈ کی جلد ازجلد تعمیر کے لئے کارروائی مکمل کرنے کی بھی ہدایت کی اور یہ بھی کہا کہ سڑکوں اور عمارتوں کی تعمیر کے لئے غیر ضروری بجٹ تخمینے کی حوصلہ شکنی کی جائے گی۔
سیکرٹری سی اینڈ ڈبلیو نے بریفنگ دیتے ہوئے وزیر اعلی کو بتایا کہ ناقص کارکردگی پر 144 افسروں اور اہلکاروں کے خلاف انضباطی کارروائی کی گئی ہے اور مزید براں یہ کہ پنجاب میں سی اینڈ ڈبلیو کے 1027ترقیاتی منصوبے جلد مکمل کئے جائیں گے
صوبائی وزیرتعمیرات و مواصلات سردار محمد آصف نکئی،پرنسپل سیکرٹری وزیراعلیٰ، سیکرٹری تعمیرات و مواصلات، سپیشل مانیٹرنگ یونٹ کے سربراہ اور متعلقہ حکام کی بھی اجلاس میں شرکت کی۔
