ملتان، 24 مئی (اے پی پی):جنوبی پنجاب کی ثقافت و تہذیب کے فروغ کیلئے پنجاب حکومت کا احسن اقدام، وزیراعظم عمران خان کے وژن کے مطابق سیاحت کے فروغ بارے اقدامات کا آغاز کر دیا گیا ہے جس کے تحت ملتان میں میوزیم کی تعمیر کیلئے 80 ملین روپے کی سکیم منظور ہو گئی ہے، میوزیم کی تعمیر کیلئے قلعہ کہنہ قاسم باغ سے ملحقہ 10 کنال کی اراضی مختص کی گئی ہے۔
سیکرٹری ٹورزم اینڈ آرکیالوجی احسان بھٹہ نے کمشنر آفس آمد کے دوران کھدائی ملنے والے نوادرات کے ڈسپلے کیلئے ملتان میں جگہ طلب کی،جس پر کمشنر جاوید اختر محمود نے دمدمہ کا پہلا فلور نواددات کیلئے مختص کردیا ہے۔ جاوید اختر محمود نے کہا کہ ڈویژنل انتظامیہ محکمہ سیاحت و آرکیالوجی کو ہر ممکن معاونت فراہم کرے گی۔انہوں نے کہا کہ زندہ قومیں اپنی ثقافت کی حفاظت کرتی ہیں، ملتان دنیا کی قدیم ترین ثقافت کا وارث ہےکسی بھی علاقے کی ثقافت میں اس کے ماضی کی جھلک نمایاں ہوتی ہے۔
سیکرٹری ٹورزم نے کہا حکومت نے قدیم تہذیب، ورثہ کو محفوظ بنانے کا فیصلہ کیا ہے اور میوزیم کی تعمیر شہر اولیاء کے باسیوں کیلئے تحفہ ہوگا۔انہوں نے کہا ملتان سے میرا تعلق بہت گہرا، اس کی مٹی سے پیار ہے ، ساؤتھ پنجاب سیکرٹریٹ کے قیام سے ملتان کی اہمیت مزید بڑھ گئی ہے۔
