لاہور۔6مئی (اے پی پی):وزیراعظم عمران خان نے کہا ہے کہ ماضی میں جنوبی پنجاب وسائل کی غیر منصفانہ تقسیم کی بدولت ترقی کے سفر میں پیچھے رہ گیا، پاکستان تحریک انصاف کی حکومت جنوبی پنجاب کی ترقی کے لئے ہر ممکن اقدامات اٹھائے گی۔ ان خیالات کا اظہار انہو ں نے جمعرات کو جنوبی پنجاب سے تعلق رکھنے والے ممبران قومی و صوبائی اسمبلی سے ملاقات میں گفتگو کرتے ہوئے کیا۔ اس موقع پر وفاقی وزیر برائے صنعت مخدوم خسرو بختیار، وزیر اعلی پنجاب سردار عثمان بزدار اور صوبائی وزیر خزانہ مخدوم ہاشم جواں بخت بھی موجود تھے۔ ممبران قومی اسمبلی میں فاروق اعظم، رانا قاسم نون، سردار نصراللہ خان دریشک، طاہر اقبال، عبدالغفار وٹو، میاں شفیق آرائیں، سردار عامر طلال گوپانگ، ممبر صوبائی اسمبلی پنجاب سمیع اللہ چوہدری، حسنین دریشک اور دوست محمد مزاری شامل تھے۔ملاقات میں جنوبی پنجاب میں عوامی فلاحی، ترقیاتی اور جنوبی پنجاب سیکرٹریٹ کے قیام کے حوالے سے امور پر گفتگو کی گئی۔ ممبران نے اپنے متعلقہ حلقوں میں عوام الناس کو درپیش مسائل کے حل بالخصوص سڑکوں، پینے کے صاف پانی کی فراہمی اور سیوریج سمیت دیگر بڑے ترقياتی منصوبوں کے حوالے سے تجاویز پیش کیں۔ممبران نے وزیر اعظم کی جنوبی پنجاب میں خصوصی دلچسپی اور فلاحی و ترقیاتی منصوبوں کے حوالے سے ترجیحات مرتب کرنے پر وزیر اعظم کا شکریہ ادا کرتے ہوئے کہا کہ ماضی میں جنوبی پنجاب کے عوام کو نظر انداز کیا گیا، پاکستان تحریک انصاف کی حکومت حقیقی معنوں میں جنوبی پنجاب کی ترقی و خوشحالی کے ویزن پر عملدرآمد ممکن بنارہی ہے۔ وزیراعظم عمران خان نے ممبران کو اپنے متعلقہ حلقوں میں عوام کو درپیش مسائل کے حل کو ترجیحی بنیادوں پر ممکن بنانے کی ہدایت کرتے ہوئے بھرپور تعاون کی یقین دہانی کرائی اور کہا کہ مجوزہ ترقیاتی منصوبوں کے حوالے سے سفارشات کی تر جیحی بنیادوں پر حتمی منظوری دینے کے لئے وہ جلد ہی اجلاس کی صدارت کریں گے ۔وزیر اعظم نے کہا کہ ماضی میں جنوبی پنجاب وسائل کی غیر منصفانہ تقسیم کی بدولت ترقی کے سفر میں پیچھے رہ گیا۔ پاکستان تحریک انصاف کی حکومت جنوبی پنجاب کی ترقی کے لئے ہر ممکن اقدامات اٹھائے گی۔ وزیراعظم عمران خان نے مزید کہا کہ پاکستان میں خوشحالی اور معاشی ترقی قانون کے يكساں اطلاق اور عوام کوانصاف کی يكساں فراہمی سے ہی یقینی بنائی جا سکتی ہے۔
