جدہ،08مئی(اے پی پی): وزیر اعظم عمران خان اور سعودی ولی عہد شہزادہ محمد بن سلمان نے تمام شعبوں میں پاکستان اور سعودی تعلقات کو مزید مضبوط کرنے کے عزم کے اظہار کیا ہے۔
وزیر اعظم عمران خان نے جدہ میں سعودی ولی عہد شہزادہ محمد بن سلمان بن عبد العزیز آل سعود سے ملاقات کی ، جس دوران دوطرفہ ، علاقائی اور بین الاقوامی امور پر بات چیت کی گئی۔ دونوں رہنماؤں نے دونوں ممالک کے مابین مضبوط اور تاریخی تعلقات کو ایک دوسرے کے ساتھ مشترکہ عقائد ، مشترکہ اقدار ، باہمی اعتماد اور باہمی حمایت کی دیرینہ روایت سے مضبوطی سے جڑے رکھنے پر اتفاق کیا۔
ملاقات کے دوران موجودہ دو طرفہ سیاسی ، معاشی ، تجارتی ، دفاعی اور سیکیورٹی تعلقات کو مزید مضبوط کرنے پر بھی اتفاق کیا گیا اور پاکستان میں سعودی سرمایہ کاری بڑھانے ، توانائی کے شعبے میں تعاون اور سعودی عرب میں پاکستانیوں کے لئے ملازمت کے مواقع بڑھانے پر خصوصی زور دیا گیا۔
وزیر اعظم نے ولی عہد شہزادہ کے حال ہی میں شروع کیے گئے “گرین سعودی عرب اور گرین مشرق وسطی” کے اقدامات کو سراہا اور سعودی ولی عہد شہزادہ محمد بن سلمان بن عبد العزیز آل سعود کے وژن اور “10 ارب درخت سونامی” سمیت اپنے ماحول سے متعلق اقدامات کے مابین ہم آہنگی پیدا کرنے کی امید کی۔
وزیر اعظم نے سعودی عرب میں موجود 20 لاکھ سے زائد پاکستانیوں کے مثبت اور تعمیری کردار پر روشنی ڈالی اور دونوں رہنماؤں نے انسانی وسائل کے شعبے میں باہمی تعاون سے زیادہ سے زیادہ فائدہ اٹھانے کے طریقوں پر تبادلہ خیال کیا۔ وزیراعظم نے کوویڈ 19 وبائی مرض کے دوران پاکستانی تارکین وطن کی فلاح و بہبود کے لئے خاطر خواہ اقدامات کرنے پر سعودی قیادت کا شکریہ ادا کیا۔
مقبوضہ کشمیر کی صورتحال پر روشنی ڈالتے ہوئے وزیر اعظم نے جموں و کشمیر تنازعہ کے پرامن حل کی اہمیت پر زور دیا جبکہ افغانستان میں امن اور مفاہمت کے لئے پاکستان کی مستقل کوششوں پر بھی روشنی ڈالی۔ وزیر اعظم نے علاقائی امن و سلامتی کو فروغ دینے پر سعودی ولی عہد کی کوششوں اور اقدامات کی تعریف بھی کی۔
ملاقات کے بعد وزیر اعظم عمران خان اور سعودی ولی عہد شہزادہ محمد بن سلمان بن عبد العزیز آل سعود نے سعودی پاکستان سپریم کوآرڈینیشن کونسل (ایس پی ایس سی سی) کے قیام سے متعلق معاہدے پر دستخط کیے۔ وزیر اعظم عمران خان اور سعودی ولی عہد کی زیرصدارت یہ کونسل پاکستان سعودی تعلقات کی ترقی کو اسٹریٹجک سمت فراہم کرنے کے لئے تیار کی گئی ہے۔ وزیر اعظم نے اس امید کا اظہار کیا کہ ایس پی ایس سی سی تمام شعبوں میں دوطرفہ تعاون کو بڑھاوا دینے میں اپنا کردار ادا کرے گا۔
دونوں رہنماؤں کی موجودگی میں پاکستان اور سعودی عرب کے مابین متعدد باہمی معاہدوں پر دستخط بھی کیے گئے ، جس میں جرائم کے خلاف جنگ میں تعاون ، سزا یافتہ قیدیوں کی منتقلی ، منشیات کی روک تھام ، توانائی ، پن بجلی گھر منصوبوں ، ٹرانسپورٹ ، مواصلات اور آبی وسائل کی ترقی سمیت دیگر معاہدے شامل ہیں۔
ملاقات میں وزیر اعظم عمران خان نے سعودی ولی عہد شہزادہ محمد بن سلمان بن عبد العزیز آل سعود کو جلد دورہ پاکستان کی دعوت بھی دی ۔
