اسلام آباد ، 28 مئی (اے پی پی ): وزیر خارجہ مخدوم شاہ محمود قریشی عراقی ہم منصب کی دعوت پر عراق کے تین روزہ دورے پر روانہ ہو گئے ۔وزیر خارجہ، عراقی ہم منصب فواد حسین کے ساتھ خصوصی ملاقات کریں گے، ملاقات میں دو طرفہ تعلقات، کثیرالجہتی شعبہ جات میں دو طرفہ تعاون کے فروغ،مسلم امہ کو درپیش چیلنجز سمیت اہم علاقائی و عالمی امور پر تبادلہ خیال کیا جائے گا۔
وزیر خارجہ، عراقی صدر برہام صالح سمیت عراق کی اعلیٰ قیادت سے بھی ملاقات کریں گے، ملاقاتوں میں ہر سال “زیارات کیلئے عراق آنے والے زائرین” کی مشکلات اور ان کی سہولت کے لیے اقدامات کے حوالے سے بھی تبادلہ ء خیال کیا جائے گا جبکہ عراقی قیادت کے ساتھ دو طرفہ سیاسی و دفاعی تعاون بڑھانے کے حوالے سے بھی بات چیت ہو گی ۔
وزیر خارجہ کا یہ دورہ عراق ،وزیر اعظم عمران خان کے وژن کی روشنی میں مسلم ممالک کے ساتھ اعلیٰ سطحی روابط کے فروغ کی ایک کڑی ہے ۔توقع ہے کہ وزیر خارجہ کے اس دورہ عراق سے دونوں ممالک کے درمیان دو طرفہ تعلقات مزید مستحکم ہوں گے۔
