لاہور،20مئی(اے پی پی):وفاقی وزیر داخلہ شیخ رشید احمد اور وزیراعلیٰ پنجاب سردار عثمان بزدار کے درمیان جمعرات کو یہاں ملاقات ہوئی،جس دوران باہمی دلچسپی کے امور، سیاسی صورتحال اورامن عامہ پر تبادلہ خیال کیا گیا۔
ملاقات میں گفتگو کرتے ہوئے وفاقی وزیر داخلہ شیخ رشید احمدنے کہا ہے کہ وزیراعلیٰ عثمان بزدار وزیراعظم عمران خان کے فرنٹ لائن سپاہی ہیں، وزیراعظم عمران خان کی قیادت میں تحریک انصاف کی حکومت پہلے سے زیادہ مضبوط ہے۔کوئی ڈر نہیں،سیاست میں اونچ نیچ ہوتی رہی ہے،پیشن گوئیاں کرنے والوں کی دال پہلے کی طرح اب بھی نہیں گلے گی۔انہوں نے کہا کہ پنجاب حکومت راولپنڈی کے عوام کے مسائل کو ترجیحی بنیادوں پر حل کررہی ہے، اللہ تعالیٰ کے فضل و کرم سے ملک میں امن وعامہ کی صورتحال اطمینان بخش ہے۔
شیخ رشید احمد نے کہا کہ وزیراعلیٰ عثمان بزدار کی قیادت میں پنجاب حکومت نے کورونا کا پھیلاؤ روکنے کیلئے بروقت اقدامات کیے ہیں، بزدار حکومت کے کورونا کے خاتمے کے لئے اقدامات قابل تقلید ہے۔
اس موقع پر وزیر اعلیٰ پنجاب عثمان بزدار نے کہا کہ پنجاب کو ایک ٹیم ورک کے طورپر چلارہے ہیں۔سیاست میں رواداری،برداشت اوربھائی چارے کے قائل ہیں۔انہوں نے کہا کہ نفاق کے بیج بونے والوں کوپہلے اپنے گریبان میں جھانکنا چاہیئے۔تنقید برائے تنقید کرنا،الزامات لگانا اوردشنام طرازی ہمارا شیوہ نہیں۔
عثمان بزدار نے کہا کہ انتقام کی سیاست کو ہمیشہ کیلئے دفن کردیا ہے،ماضی میں سیاسی مخالفین کوجان بوجھ کر انتقام کانشانہ بنایا گیا۔انہوں نے کہا کہ راولپنڈی تحریک انصاف کا قلعہ ہے،شہر کے مسائل حل کرنے پر پوری توجہ ہے،راولپنڈی کیلئے خصوصی ترقیاتی پیکیج تیار کرلیاہے۔
وزیر اعلیٰ عثمان بزدار نے کہا کہ صوبے میں عوام کے جان ومال کے تحفظ کیلئے تمام ضروری اقدامات کیے ہیں، قانون کی عملداری کو یقینی بنایاگیا ہے۔انہوں نے کہا کہ کورونا سے بچاؤ کے لئے ڈاکٹرز،ہیلتھ پروفیشنلز، پولیس اور دیگر ادارے سرتوڑ محنت کر رہے ہیں، شہریوں کی جانب سے ایس او پیز پر عمل سے کورونا کا پھیلاؤ کم ہوگا۔
مشیر ڈاکٹر سلمان شاہ بھی اس موقع پر موجود تھے۔
