پشاور، 21مئی(اے پی پی): تاجر برداری شفیع بازار صدر کینٹ کے زیر اہتمام فلسطینی مسلمانوں پر ظلم و بربریت اور اسرائیل کے خلاف پشاورصدر کینٹ شفیع بازار سے صدر تختو مسجد تک احتجاجی ریلی نکالی گئی، اسرائیل مردہ باد ریلی کی قیادت شفیع بازار صدر اکبرعلی مرکزی ترجمان ،ہارون صافی ،جنرل سیکٹرٹری حضرت خان باجوڑی،ناظم میاں نور محمد کر رہے تھے۔
اسرائیل مردہ باد ریلی سے خطاب کرتے ہوئے ناظم میاں نور محمد اور صدر اکبرعلی ترجمان ہارون صافی کے کہنا تھا کہ آج ہم فلسطینی مسلمانوں سے اظہار یکجہتی کیلئے اور اسرائیل کے ظلم و ستم کے خلاف نکلے ہیں، اسرئیل کی صیہونی دہشت گرد فلسطین میں موجود پورے عالم کے مسلمانوں کیلئے مقدس جگہ بیت المقدس کے تقدس کو پامال کر رہے ہیں، وہاں پر مسلسل نمازیوں کو زبردستی نکالا جارہا ہے۔ انہوں نے کہا کہ اسرائیل فلسطین میں بچوں ، عورتوں اور بوڑھوں پر جو ظلم و ستم کر رہاہے تاریخ میں اسکی مثال نہیں ملتی۔انہوں نے کہا کہ آج اگر ہم بیت المقدس کے تقدس کو نہیں بچا پائے تو پھر حرمین شریفین بھی خطرے میں پڑ سکتا ہے۔
احتجاج میں تاجربرداری اور دکانداروں نے شرکت کی،احتجاج کے آخر میں اسرئیل کا جھنڈا نظر آتش کیا گیا۔
