ملتان، 19مئی(اے پی پی): ڈپٹی کمشنر علی شہزاد کی ہدایت پرآلودگی پھیلانے والے روایتی بھٹوں کے خلاف کاروائی دوبارہ شروع کردی گئی ہے۔اسسٹنٹ کمشنر صدر عدنان بدر کی قیادت میں قادر پور راں کے ایریا میں 7 روایتی بھٹوں کو سیل کر دیا گیا۔محکمہ ماحولیات اور پولیس نے کاروائی میں حصہ لیا۔
اسسٹنٹ کمشنر صدر عدنان بدر نے کہا کہ روایتی بھٹہ مالکان کو اپنے بھٹے زگ زیگ سسٹم پر منتقل کرنے کے لئے متعدد بار وقت دیا گیا، بھٹہ مالکان نے بلور لگا لئے لیکن انہیں فعال نہیں کیا، اس کے علاوہ بھٹہ مالکان بھٹوں میں اینٹوں کی بھرائی بھی زگ زیگ طریقے کی بجائے روایتی طریقے سے کررہے ہیں۔انہوں نے کہا کہ بھٹہ مالکان حکومت کو دھوکہ دینے کی کوشش کررہے ہیں، روایتی بھٹوں کی چمنیوں سے نکلنے والا کالا دھواں ماحول کو آلودہ کر رہا ہے، یہ آلودگی سموگ کا باعث بنتی ہے۔
اسسٹنٹ کمشنر صدر عدنان بدر نے کہا کہ روایتی بھٹے اب سیل ہونگے اور انہیں کسی صورت چلنے کی اجازت نہیں دی جائے گی۔
