اسلام آباد۔30مئی (اے پی پی):کویت نے 10 سال بعد پاکستانی شہریوں کے لئے ویزا بحال کردیا ہے، اتوار کو وزارت داخلہ کی طرف سے جاری بیان کے مطابق وزیر داخلہ شیخ رشید احمد نے کویت کے وزیراعظم شیخ صباح خالدالحامدالصباح سے ملاقات کی جس میں کویت کے وزیر داخلہ اور پاکستانی سفیر بھی موجود تھے، ملاقات میں پاک ۔ کویت دوطرفہ تعلقات سمیت باہمی دلچسپی کےامور پر گفتگو کی گئی، وزیر داخلہ شیخ رشید احمد نے کویتی وزیر اعظم سے ویزا بحالی پر بات چیت کی۔وزیر داخلہ نے کویتی وزیر اعظم کو وزیر اعظم عمران کا خصوصی مراسلہ بھی پیش کیا۔ بیان کے مطابق کویتی وزیر اعظم اور وزیر داخلہ شیخ رشید احمد کے مابین ملاقات میں اہم فیصلے کیے گئے، 2011 سے بند پاکستانی شہریوں کے لئے کویتی ویزہ کی بحالی پر بڑی پیش رفت ہوئی اور پاکستان اور کویت کے درمیان فیملی اور بزنس ویزا فوری بحال کرنے کا فیصلہ کیا گیا،پاکستانی ورکرز کو معاہدے کے مطابق کویتی ویزا جاری کرنے کا فیصلہ بھی کیا گیا،بیان میں بتایا گیا ہے کہ میڈیکل اور آئیل فیلڈ میں ٹیکنیکل ویزا پر کوئی پابندی نہیں ہوگی،خلیج ممالک میں رہنے والے پاکستانی آن لائن ویزا لے کر اب کویت آسکیں گے۔کویت کے وزیر اعظم نے کہا کہ پاکستان اور کویت کے درمیان تعلقات سات دہائیوں پر محیط ہیں، دونوں ممالک کے عوام کے درمیان پیار اور اعتماد کا رشتہ ہے، وزیر داخلہ شیخ رشید احمد نے کہا کہ پاکستان اور کویت کے درمیان تعلقات انتہائی دیرینہ ہیں۔ باہمی تعلقات کی بنیاد باہمی بھائی چارہ اور محبت ہے۔ انہوں نے کہا کہ تمام پاکستانی کویت کو اپنا دوسرا گھرسمجھتے ہیں،پاکستانی خاندانوں اور کاروباری طبقے کو کویتی ویزا بندش سے بے پناہ مسائل درپیش تھے، انہوں نے کہا کہ پاکستانی لیبر کا کویت کی اولین ترقی میں بہت اہم کردار ہے۔ورکرز ویزا بحال ہونے سے پاکستانیوں کے لئے روزگار کے نئے مواقع پیدا ہونگے، انہوں نے کہا کہ کاروباری ویزا بحالی سے دونوں ملکوں کے درمیان تجارت بھی بڑھے گی۔
