اسلام آباد،28جون (اے پی پی): چیئرمین سینیٹ محمد صادق سنجرانی نے کہا ہے کہ احتسابی عمل کے نتیجے میں تاجر اور کاروباری طبقے کے ہراساں ہونے کے تاثر کی نفی ہونی چاہیے۔
ان خیالات کا اظہار انہوں نے چیئر مین نیب جسٹس (ر) جاوید اقبال سے گفتگو کرتے ہوئے کیا جنہوں نے پیر کو پارلیمنٹ ہاؤس میں ان سے ملاقات کی، ملاقات میں چیئرمین نیب نے چیئرمین سینیٹ محمد صادق سنجرانی کو نیب کی سالانہ رپورٹ برائے 2020 پیش کی۔ چیئرمین نیب نے ایوان بالاکے سربراہ کوملک میں جاری احتسابی عمل کے متعلق تفصیلی آگاہ کیا، احتسابی عمل کو زیادہ شفاف اور موثر بنانے کیلئے اٹھائے جانے والے اقدامات بارے بریف کیا۔
چیئرمین سینیٹ نے کہا کہ احتساب کے عمل میں شفافیت اور غیر جانبد اری کو ہر صورت برقرار رکھا جائے،احتسابی عمل کے نتیجے میں تاجر اور کاروباری طبقے کے ہراساں ہونے کے تاثر کی نفی ہونی چاہیے۔
اس موقع پر چیئرمین نیب نے کہا کہ کرپشن کے خاتمے سے تاجروں اور سرمایہ کاروں کو بہتر ماحول میسر ہوگا۔ ارکان پارلیمنٹ اور کاروباری طبقے کی جانب سے مثبت تجاویز کا خیر مقدم کرتے ہیں۔ انہوں نے کہا کہ احتسابی عمل سے کسی کو خوفزدہ ہونے کی ضرورت نہیں ہے۔ ہمارا ایجنڈا صرف پاکستان کی ترقی و خوشحالی کیلئے سازگار ماحول فراہم کرنا ہے۔
