لاہور، 13 جون (اے پی پی): پنجاب میں بجٹ پیش ہونے کے اہم مرحلہ سے قبل پی ٹی آئی سمیت مسلم لیگ ن اور پی پی پی کےمنتخب عوامی نمائندوں نے وزیراعلی پنجاب پر اظہار اعتماد کر دیا۔ وزیراعلیٰ پنجاب سردار عثمان بزدار سے مسلم لیگ ن اور پیپلزپارٹی کے اراکین صوبائی اسمبلی نے اتوار کو یہاں ملاقاتیں کیں ۔
اراکین اسمبلی نے وزیراعلی پنجاب سردار عثمان بزدار کی قیادت پر مکمل اعتماد کیا اور اراکین اسمبلی نے پنجاب کے آئندہ بجٹ میں عوامی فلاح کے لئے شاندار اقدامات تجویز کرنے پر وزیراعلی عثمان بزدار کے ویژن کو سراہااورمنتخب نمائندوں نے وزیراعلیٰ عثمان بزدار کو حلقوں اورعلاقے کے مسائل سے آگاہ کیا۔
وزیراعلیٰ عثمان بزدارنے اراکین اسمبلی کو مسائل ترجیحی بنیادوں پرحل کرنے کی یقین دہانی کرائی اور کہا کہ میرے دروازے سب کے لئے کھلے ہیں اورپنجاب کا نیا بجٹ صوبے کی عوام کے لئے ترقی و خوشحالی کا نیا باب رقم کرے گا۔ انہوں نے کہا کہ صوبے کی تاریخ میں ترقیاتی بجٹ میں ریکارڈ اضافہ کیا جا رہا ہےتعلیم،صحت،زراعت، انفراسٹرکچر اور دیگر شعبوں کے لئے زیادہ فنڈز مختص کئے جائیں گے۔
عثمان بزدار نے کہا کہ ہر ضلع کیلیے علیحدہ ترقیاتی پیکیج بنایا گیا ہے،کسی ضلع کی حق تلفی نہیں ہونے دیں گے،سازشیں کرنے والوں کی منفی سیاست ہمیشہ کے لئے دفن ہو چکی ہےاب افراتفری نہیں بلکہ عوام کی خدمت کی سیاست چلے گی۔انہوں نے کہا کہ وزیراعظم عمران خان کی قیادت میں نئے پاکستان میں کرپشن اور کرپٹ عناصر کی کوئی گنجائش نہیں، تنقید کی پرواہ کئے بغیر عوامی خدمت کے سفر کومزید تیزی سے آگے بڑھائیں گے۔
وزیراعلی پنجاب سردار عثمان بزدار نے کہا کہ پی ڈی ایم کی منفی سیاست اپنی موت آپ مر چکی ہے،مسترد شدہ عناصرکی انتشار کی سیاست کو عوام نے رد کر دیا ہے،پی ڈی ایم کا جو حشر ہوا ہے وہ سبق آموز بھی ہے اور عبرتناک بھی، اپوزیشن کی جانب سے قوم کو تقسیم کرنے کی کوشش بری طرح ناکام رہی۔انہوں نے مزید کہا کہ پاکستان کے عوام باشعور ہیں اورکرپٹ عناصر کے جھانسے میں اب کبھی نہیں آئیں گے۔
وزیراعلی سے ملاقاتیں کرنے والےاراکین پنجاب اسمبلی نے واضح طور پر کہا کہ ہمیں سردار عثمان بزدار کی قیادت اور پالیسیوں پر پورا اعتماد ہے عوام کی خدمت کے سفر میں ان کے ساتھ کھڑے ہیں۔
ملاقات کرنے والوں میں میاں جلیل احمد شرقپوری، چودھری اشرف علی انصاری، محمد غیاث الدین، محمد فیصل خان نیازی، رئیس نبیل احمد،عنضفر عباس اور اظہر عباس چانڈیا کے علاوہ چیف وہیپ پنجاب اسمبلی ایم پی اے سید عباس علی شاہ، طاہر بشیر چیمہ، یونس انصاری اور مسعود مجید شامل تھے۔
