اسلام آباد، 28 جون (اے پی پی ): صدر مملکت ڈاکٹر عارف علوی نے کہا ہے کہ جدید آلات اور مگس بانوں کی جدید خطوط پر تربیت سے پاکستان میں شہد کی پیداوار بڑھانے کی ضرورت ہے، ملکی آب و ہوا اور نباتات مگس بانی کے لئے سازگار ماحول فراہم کرتے ہیں۔
ان خیالات کا اظہار صدر مملکت ڈاکٹر عارف علوی نے مگس بانی اور شہد کی پیداور کے متعلق اجلاس کی صدارت کرتے ہوئے کیا۔ صدر مملکت نے کہا کہ مگس بانی کے شعبے میں زرمبادلہ کمانے اور نوجوانوں کو روزگار کے مواقع مہیا کرنے کی بڑی صلاحیت ہے، نوجوانوں محدود سرمایہ کاری سے مگس بانی اور شہد کا کاروبار شروع کرسکتے ہیں۔انہوں نے کہا کہ حکومت کامیاب جوان پروگرام کے تحت نوجوان کاروباری افراد کی حوصلہ افزائی کررہی ہے اور حکومت نوجوانوں کو کاروبار کیلئے پانچ لاکھ روپے تک بلاسود قرض فراہمی کررہی ہے۔
وزارت ماحولیاتی تبدیلی اور ایرڈ یونیورسٹی نے اجلاس کو مگس بانی کے فروغ کیلئے کیے جانے والے اقدامات پر بریفنگ دی اور بتایا گیا کہ محکمہ جنگلات خیبرپختونخوا شہد کی پیداوار میں اضافے کیلئے بیری کے 60 لاکھ درخت اور پھلاہی کے ایک کروڑ درخت لگائے گا۔
