لاہور، جون 5(اے پی پی): وفاقی وزیر اطلاعات و نشریات چوہدری فواد حسین نے کہا ہے کہ میڈیا انڈسٹری سے متعلق کوئی بھی بل یا آرڈیننس صرف صحافی اداروں ، سی پی این ای اور اپوزیشن جماعتوں سمیت تمام اسٹیک ہولڈرز کی مشاورت کے بعد متعارف کرایا جائے گا۔
انہوں نے کہا کہ اس وقت میڈیا پر تجویز کردہ آرڈیننس کے حوالے سے جو خبریں چل رہی ہیں وہ بے بنیاد ہے اور اس طرح کا کوئی بھی آرڈیننس زیر غور نہیں ہے۔
ایوان اقبال میں یہاں کونسل آف پاکستان نیوز پیپرز ایڈیٹرز (سی پی این ای) کے نمائندوں سے ملاقات کے بعد میڈیا سے گفتگو کرتے ہوئے وزیر اطلاعات نے کہا کہ اس میٹنگ میں اس بات پر اتفاق کیا گیا ہے کہ موجودہ فریم ورک کو تبدیل کرنے کی ضرورت ہے تاکہ میڈیا انڈسٹری کے نئے قواعد و ضوابط کو بہتر بنانے سے اس کی ورکنگ بھی بہتر ہوسکے۔
انہوں نے کہا کہ پی ٹی آئی کی حکومت میڈیا کارکنوں کے حقیقی حقوق کے تحفظ کے لئے پرعزم ہے اور اس پر کوئی سمجھوتہ نہیں کیا جائے گا۔ انہوں نے کہا کہ میڈیا انڈسٹری میں کیمرہ پرسن اور دیگر کارکنوں کو اپنی ملازمتوں کو محفوظ بنانے کے لئے کوئی تحفظ نہیں ہے۔
وفاقی وزیر نے کہا کہ حکومت ایسا طریقہ کار لانا چاہتی ہے جس سے میڈیا کارکنوں کے حقوق کا تحفظ یقینی بن سکے۔
حکومت میڈیا کی آزادی پر یقین رکھتی ہے اور وہ اس پر کبھی پابندی نہیں لگانا چاہتی ہے کیونکہ تحریک انصاف متوسط طبقے کی جماعت ہے۔ تاہم انہوں نے اس بات کا تذکرہ کیا کہ حکومت جعلی خبروں کو روکنے کے لئے صرف قانون سازی لانا چاہتی ہے۔
تحریک انصاف کی صفوں کے بارے میں ایک سوال کے جواب میں انہوں نے کہا کہ تحریک انصاف وزیر اعظم عمران خان کی سربراہی میں تمام سطحوں پر بہت متحد ہے۔
