کوئٹہ،19جون(اے پی پی ): صوبائی وزیرخزانہ بلوچستان میر ظہور بلیدی نے کہا ہے کہ نئے مالی سال کیلئے بلوچستان کا انتہائی متوازن بجٹ پیش کیا ہے، بجٹ میں 1600 نئی اسکیمات ترقیاتی اسکیمات رکھی گئی ہیں۔
صوبائی وزیرخزانہ بلوچستان میر ظہور بلیدی نے نئے مالی سال کے حوالے سے ہفتہ کو یہاں پوسٹ بجٹ پریس کانفرنس میں بتایا کہ صوبے کے فنڈز لیپس ہونے کی باتیں بلا جواز ہیں، بلوچستان بینک قائم کرنے جارہے ہیں، حکومت کی ترجیح سترہ پائیدار ترقیاتی اہداف کے ٹارگٹ حاصل کرنا ہیں۔ انہوں نے بتایا کہ حکومت کی آمدنی بڑھانے کیلئے اصلاحات لا رہے ہیں، ٹیکس ریفارمز کیلئے بھی ای بینکنگ کا نظام متعارف کروائیں گے۔
وزیر خزانہ کا کہنا تھا کہ رواں مالی سال کے دوران 84 ارب روپے کے خسارے کا سامنا ہے، آمدنی کا تخمینہ 499 ارب روپے ہے۔ 346 ارب روپے غیر ترقیاتی اخراجات جبکہ 237 ارب روپے ترقیاتی مد میں رکھے گئے ہیں۔ انہوں نے کہا کہ صوبائی پی ایس ڈی پی میں 172 ارب روپے رکھے گئے ہیں جبکہ وفاق سے ملنے والے محصولات کا کل حجم 355 ارب روپے ہے۔
