لاہور،21 جون (اے پی پی): وزیراعلیٰ پنجاب سردار عثمان بزدار نے کہا ہے کہ وزیر اعظم عمران خان کی قیادت میں پاکستان معاشی ترقی کی راہ پر گامزن ہو چکا ہے، موجودہ حالات میں انتشار کی سیاست کی کوئی گنجائش نہیں ، افراتفری پھیلانے کی کوشش کرنے والے عناصر دشمن کے ایجنڈے پر چل رہے ہیں۔
ان خیالات کا اظہار وزیراعلیٰ پنجاب سردار عثمان بزدار نے گجرات سے تعلق رکھنے والے اراکین پنجاب اسمبلی سے ملاقات کے دوران کیا۔ وزیراعلیٰ نے کہا کہ مایوسی کا شکار اپوزیشن عوام کو گمراہ نہیں کر سکتی۔انہوں نے کہاکہ مسلم لیگ ق ہماری اتحادی ہے اور اتحادیوں کے ساتھ تعلقات پہلے سے زیادہ مضبوط ہیں۔
وزیراعلیٰ نے کہا کہ اتحادی جماعت سے بہترین ورکنگ ریلیشن شپ ہے،اتحادی جماعت کو ساتھ لے کر چل رہے ہیں، فیصلہ سازی کے عمل میں مسلم لیگ (ق) کو شریک کیا گیا ہے۔انہوں نے کہاکہ میرے دروازے ہمہ وقت کھلے ہیں ، عوام کے مسائل کے حل کے لئے کوشاں ہیں ، سب کو ساتھ لے کر چلتا ہوں ، ماضی میں ون مین شو تھا اب فیصلے مشاورت سے ہوتے ہیں۔
اراکین پنجاب اسمبلی نے وزیراعلیٰ عثمان بزدار کو عوام دوست بجٹ پیش کرنے پر مبارکباد دیتے ہوئے کہاکہ پنجاب کا بجٹ ہر ضلع کی یکساں ترقی کا روڈ میپ ہے،ڈسٹرکٹ کے علیحدہ ڈویلپمنٹ پیکیج سے صوبے میں ترقی کانیا دور شروع ہوگا،پنجاب کی تاریخ کا سب سے بہترین بجٹ پیش کر کے آپ نے عوام کے دل جیت لئے ہیں۔
ملاقات کرنے والوں میں چودھری لیاقت علی، سلیم سرور جوڑا، میاں محمد اختر حیات اورمحمدارشد چودھری شامل تھے جبکہ اس موقع پر چیف وہپ پنجاب اسمبلی ایم پی اے سید عباس علی شاہ بھی موجود تھے۔
