پاراچنار ، 26 جون (اے پی پی ): پاراچنار میں شہریوں نے منشیات کے خلاف احتجاج کیا اور متعلقہ حکام سے منشیات کے کاروبار میں ملوث افراد کے خلاف کارروائی کرنے اور منشیات کی تدارک کیلئے اقدامات اٹھانے کا مطالبہ کیا ۔
کشمیر چوک پاراچنار میں احتجاجی مظاہرے کے بعد پریس کانفرنس سے خطاب کرتے ہوئے تنظیم تحفظ ملت کے رہنما مسرت بنگش اور دیگر رہنماؤں نے کہا کہ منشیات معاشرے کیلئے ناسور ہے اور آئس سمیت مختلف منشیات کے استعمال میں روز بروز اضافہ ہوتا جارہا ہے جبکہ منشیات سے نہ صرف ہمارے نوجوان تباہ ہو رہے ہیں بلکہ معاشرے کی جڑیں کھوکھلی ہورہی ہیں ۔
مسرت بنگش نے مطالبہ کیا کہ نوجوان نسل کے مستقبل سے کھیلنے کا سلسلہ بند کیا جائے اور مفت یا انتہائی کم قیمت میں نوجوان نسل کو منشیات کی فراہمی کا سلسلہ روکا جائے ۔
