رحیم یارخان، 06جون (اے پی پی ):ڈپٹی کمشنر ڈاکٹر خرم شہزاد نے منگل کو یہاں دریائے سندھ کے کنارے آباد موضع احمد کڈن کے مقام پر دریائی کٹائو کا جائزہ لیا گیا۔
ڈپٹی کمشنر نے موضع احمد کڈن کے باسیوں سے ملاقات میں کٹائو کے نقصانات کے حوالے سے گفتگو کی جبکہ ڈپٹی کمشنر کو دریائے سندھ کے کٹائو کے بارے میں بریفنگ دی گئی۔اس موقع پر گفتگو کرتے ہوئے ڈپٹی کمشنر نے کہا کہ 2004سے دریائے سندھ کا کٹائو جاری ہے، اس میں تیزی 2010 کے سیلاب میں آئی۔دریائے سندھ کے کٹائو کے باعث متعدد بستیاں دریا برد ہوچکی ہیں۔
ڈاکٹر خرم شہزاد نے کہا کہ دریائے سندھ کے کٹائو کے باعث بہت سے افراد متاثر ہوئے اور نقل مکانی کی،موجودہ دریائی کٹائو کے باعث قدیمی قبرستان بھی ختم ہوگیا ہے۔ انہوں نے بتایا کہ وزیر اعلیٰ پنجاب سردار عثمان خان بزدار نے دریائی کٹائو کا نوٹس لیا ہے۔ وزیر اعلیٰ نے مزید نقصان روکنے کے لیئے منچن بند پر تین مزید اسٹرکچر بنانے کی منظوری دی ہے۔
ڈی سی نے بتایا کہ وزیر اعلیٰ پنجاب نے صوبائی وزیر خزانہ ہاشم جواں بخت کی درخواست پر دریائی کٹائو سے نزدیکی آبادیوں کو محفوظ بنانے کے لئے فوری اقدامات کی ہدایت کی ہے۔ دریائے سندھ کے کٹائو کے باعث متاثرہ افراد کو رہنے کی جگہ اور امداد کی جائے گی۔قبرستان کے لیے بھی نئی جگہ دی جائے گی۔
ڈاکٹر خرم شہزاد نے کہا کہ دریا کے کٹائو سے بچت کے لیے منچن بند پر سٹرکچر بننے چاہیے تھے، موجودہ بجٹ میں تین سٹرکچر کے فنڈز منظور ہوئے ہیں۔محکمہ اریگیشن سے کوشش کریں گے کہ اسٹرکچر کا کام جلد شروع ہوجائے۔
