کراچی،6جولائی ( اے پی پی):گورنرسندھ عمران اسماعیل نے کہا ہے کہ موجودہ حکومت کی کوشش ہے کہ سندھ کی عوام کو زیادہ سے زیادہ سہولتیں فراہم کی جائیں۔
ان خیالات کا اظہار انہوں نے مخدوم فضل اور ان کی رہائشگاہ پر جی ڈی اے کے رہنماﺅں سے ملاقات کیبعد میڈیا سے گفتگو میں کیا۔ ملاقات میں علی نوازشاہ،مسرورجتوئی،امام بخش،خضرحیات منگریو اور جام ذوالفقار موجود تھے۔ اس موقع پر گورنر سندھ کے ایڈوائزر امید علی جونیجو بھی موجود تھے۔ ملاقات میں سندھ کے نشاندہی کئے جانے والے مسائل، سیاسی حالات اور باہمی دلچسپی کے دیگر امور پر تبادلہ خیال کیا گیا۔
میڈیا سے گفتگو کرتے ہوئے گورنر سندھ نے کہا کہ موجودہ حکومت کی کوشش ہے کہ سندھ کی عوام کو زیادہ سے زیادہ سہولتیں فراہم کی جائیں ۔ انہوں نے کہا کہ سندھ میں مسائل کی نشاندہی کی گئی ہے اور آج اس ملاقات کا مقصد بھی یہ ہی ہے کہ ان مسائل کا حل تلاش کرکے سفارشات وزیراعظم کو ارسال کی جائیں۔
گورنر سندھ نے کہا کہ ہماری کوشش ہے کہ سندھ کے مسائل کا جلد از جلد حل نکالا جائے ۔ انہوں نے کہا کہ جی ڈی اے ہماری اتحادی جماعت ہے اور سندھ کے معاملات کے حل کے لئے ہم سب کی شمولیت چاہتے ہیں۔
ایک سوال کے جواب میں انہوں نے کہا کہ سندھ گورنرہاﺅس میں بانی پاکستان قائداعظم کے زیراستعمال کی اشیا موجود ہیں یہی وجہ ہے کہ سندھ گورنر ہاﺅس میں اسٹڈی ٹوئرز ہوتے ہیں جس سے طلبہ فائدہ اٹھارہے ہیں۔
