گوادر،06جولائی(اے پی پی):وفاقی وزیر برائے منصوبہ بندی اسد عمر نے کہا ہے کہ نارتھ فری زون گوادر کے پہلے زون سے پینتیس گنا زیادہ بڑا صنعتی زون ہے، چینی سرمایہ کاروں نے اس زون میں بھرپور سرمایہ کاری کرنے کے عزم کا اظہار کرتے ایک ارب ڈالر سے زائد کی سرمایہ کاری کا بتایا ہے۔
وزیر برائے منصوبہ بندی اسد عمر نے جنوبی بلوچستان پیکیج کے حوالے سے میڈیا بریفنگ میں بتایا کہ وزیرِ اعظم نے دورہ گوادر کے دوران بلوچستان پیکیج کی پیش رفت کا جائزہ لیا، چھ سو ارب روپے سے زائد کے جنوبی بلوچستان پیکیج سے 53منصوبے اس سال کے ترقیاتی پروگرام میں شامل کیے گئے ہیں، وفاقی پی ایس ڈی پی میں بلوچستان کے لئے کل 1200ارب کے منصوبے ہیں۔انہوں نے کہا کہ بلوچستان میں اس پیمانے پر ترقیاتی کام پاکستان کی تاریخ میں پہلے نہیں ہوا، وزیرِ اعظم نے نومبر میں اس علاقے کے لئے تاریخی پیکیج کا اعلان کیا تھا۔
اسد عمر نے کہا کہ ترقیاتی کام بلوچستان حکومت کی شراکت سے کیا جا رہا ہے، بلوچستان کے نوجوانوں کو انٹرنیٹ کی جدید سہولیات فراہم کی جا رہی ہے۔انہوں نے کہا کہ جیسا کام وزیراعظم عمران خان کی قیادت میں ہورہا ہے ویسا پہلے کبھی نہیں ہوا۔
