اسلام آباد۔23جولائی (اے پی پی):وزیراعظم کے معاون خصوصی برائے سیاسی ابلاغ ڈاکٹر شہباز گل نے کہا ہے کہ نور مقدم قتل کیس کی تفتیش میرٹ پر ہو گی اور کیس کو منطقی انجام تک پہنچا کر انصاف کے تقاضے پورے کئے جائیں گے۔ ان خیالات کا اظہار انہوں نے جمعہ کو مقتولہ نور مقدم کے والد سابق سفیر شوکت علی اور ان کی والدہ سے اظہار تعزیت کے بعدمیڈیا سے گفتگو کرتے ہوئے کیا۔ انہوں نے کہا کہ سابق سفیر شوکت علی نے ملک کی طویل عرصہ خدمت کی، ان کی بیٹی کے قتل پر پوری قوم دکھی اور غمگین ہے۔ انہوں نے کہا کہ وزیراعظم عمران خان ذاتی طور پر اس قتل پر افسردہ ہیں ، انہوں نے اس معاملے پر آئی جی اسلام آباد سے بھی بات کی ہے، وہ ذاتی طور پر اس کیس کی نگرانی کر رہے ہیں۔ انہوں نے کہا کہ اس مقدمے میں تمام قانونی تقاضے پورے کئے جائیں گے اور قانون کے مطابق کارروائی کی جائے گی، ہم چند دنوں میں ایسے واقعات کو بھول جاتے ہیں لیکن ہمیں صرف جذباتی ردعمل کی بجائے سنجیدگی کا مظاہرہ کرنا چاہئے، حقیقی انصاف ہونا چاہئے۔ انہوں نے کہا کہ حکومت، میڈیا، عدلیہ اور سماج کا اس تناظر میں اہم کردار ہے، میڈیا کو اس معاملے پر اپنا کردار ادا کرنا چاہئے تاکہ مقتولہ کے والدین کو انصاف کے حصول میں کوئی مشکل پیش نہ آئے، حکومت بھی ہر ممکن تعاون فراہم کرے گی۔ انہوں نے کہا کہ پولیس میرٹ پر اس معاملےکی تفتیش کرے گی، اس کیس کو منطقی انجام تک پہنچایا جائے گا اور انصاف ہو گا، اس مقدمہ میں کسی کا اثر و رسوخ استعمال نہیں ہو گا۔ انہوں نے کہا کہ فرانزک ٹیسٹ کا عمل جاری ہے، ملزم کا نام ای سی ایل میں ڈالنے سمیت دیگر اقدامات پر غور کیا جا رہا ہے۔ انہوں نے کہا کہ وزیر داخلہ شیخ رشید احمد اور وفاقی وزیر برائے انسانی حقوق ڈاکٹر شیریں مزاری بھی ذاتی طور پر اس معاملے پر آئی جی اسلام آباد سے رابطے میں ہیں۔ انہوں نے کہا کہ مقدمے کے تمام پہلو سامنے لانے سے تفتیشی عمل متاثر ہو سکتا ہے، پولیس تفتیش مکمل کرکے حقائق سامنے لائے گی، آئی جی اسلام آباد ذاتی طور پر اس مقدمے کو دیکھ رہے ہیں، یہ ٹیسٹ کیس ہے۔ انہوں نے کہا کہ مقتولہ کے والد اور والدہ انتہائی غمزدہ ہیں اور ہم ان کے اس دکھ میں برابر کے شریک ہیں۔ قبل ازیں انہوں نے مقتولہ کے اہلخانہ سے تعزیت اور فاتحہ خوانی کی۔
